Çitaku nga Haga: Kosova po i pret çlirimtarët
Sekretarja e PDK-së përshkruan atmosferën në Hagë para verdiktit dhe thotë se Kosova i pret ish-krerët e UÇK-së me zemër, shpresë e besim.
Redaksia ZHURMA · · Përditësuar · 1 min lexim
Në prag të shpalljes së vendimit për ish-krerët e Ushtrisë Çlirimtare të Kosovës, sekretarja e Partisë Demokratike të Kosovës, Vlora Çitaku, ka reaguar përmes një postimi në Facebook. Ajo ka përshkruar atmosferën në rrugët e Hagës, ku ka thënë se takon të rinj e të reja, të moshuar, gra e fëmijë, të veshur me simbolet e UÇK-së.
Sipas Çitakut, në fytyrat e tyre shihet gjithçka njëkohësisht: buzëqeshje, frikë, ankth, shpresë e besim. Ajo flet për një pritje të madhe dhe një peshë që ndihet në ajër, por mbi të gjitha besim në drejtësi.
Në postimin e saj, Çitaku ka përcjellë një mesazh për ish-pjesëtarët e UÇK-së: “Kosova ju pret, çlirimtarë”. Ajo ka thënë se Kosova po i pret në shtëpi Hashim Thaçin, Kadri Veselin, Jakup Krasniqin e Rexhep Selimin, me zemër, shpresë e besim.
Çitaku ka kujtuar sakrificën dhe gjashtë vitet e qëndrimit larg Kosovës, duke theksuar se kanë mbetur më pak se 24 orë deri në vendimin e Gjykatës Speciale.
