Kurti: Të japin përgjegjësi penale ata që nuk e mbrojtën Zekajn

Kryeministri i Kosovës, Albin Kurti, ka deklaruar gjatë mbledhjes së 64-t të Këshillit të Përgjithshëm të Lëvizjes Vetëvendosje se secili zyrtar institucional që ka neglizhuar detyrat duhet të përballet me përgjegjësi penale dhe disiplinore pas dështimit të institucioneve për të parandaluar vrasjen e Arlinda Zekajt.

Në këtë mbledhje partiake, kryeministri Kurti ka shmangur pyetjet e gazetarëve jashtë sallës lidhur me kërkesat e protestuesve për shkarkimin e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla. Protestuesit nuk kanë marrë sinjale për shkarkimin e dy ministrave, ndërsa kreu i Qeverisë është fokusuar te domosdoshmëria e hetimit të secilës hallkë që ka dështuar në mbrojtjen e viktimës.

Sipas kryeministrit Albin Kurti, rasti i Zekajt dëshmon se një grua mund t'i ndjekë të gjitha rrugët ligjore, të denoncojë dhunën, të kërkojë mbrojtje dhe madje të paralajmërojë me shkrim se i rrezikohet jeta, dhe përsëri të përfundojë e vrarë. Ai ka theksuar se Arlinda bëri pikërisht atë që institucionet u kërkojnë grave kur përballen me dhunë në familje.

Gjithashtu, kreu i Qeverisë ka kujtuar se raporti i publikuar një ditë më parë ka evidentuar lëshime zinxhirore në organet përgjegjëse, duke shtuar se disa prej tyre kanë refuzuar të bashkëpunojnë. Sipas tij, do të angazhohen deri në fund që kushdo që ka shkelur obligimet ligjore të mos i shmanget drejtësisë.

Duke analizuar problemet më të gjera shoqërore, Kurti ka theksuar se vrasja ka nxjerrë në pah mentalitetin patriarkal që e konsideron gruan si pronë, ku pavarësia e saj shihet si mosbindje ndaj autoritetit mashkullor. Ai ka paralajmëruar rishikimin e kurrikulave arsimore nga edukimi parashkollor e tutje, për të luftuar rolet e trashëguara gjinore dhe për të promovuar barazinë që në fëmijëri.