Kolektivi paralajmëron protestë të re në Prishtinë për rastin e Zekajt

Edhe gjatë ditës së diel do të mbahet protestë në sheshin «Zahir Pajaziti» në Prishtinë, duke shënuar ditën e pestë radhazi të tubimeve publike, ndërsa bëhet një javë nga vrasja e 49-vjeçares nga ish-kunati i saj në Vitomiricë të Pejës. Kolektivi për Mendim dhe Veprim Feminist bëri të ditur se tubimi do të nisë nga ora 17:00, duke kërkuar liri, siguri dhe përgjegjësi nga ana e shtetit. «Kërkesat tona janë të qarta por shteti vazhdon të refuzojë të na dëgjojë. Ne nuk zmbrapsemi dhe çdo ditë që çel do të na gjejë në sheshe e përballë institucioneve që e dështuan Arlindën e po vazhdojnë ta dështojnë çdo çikë e gru në Kosovë», thuhet në njoftimin e organizatorëve, të cilët u bëjnë thirrje qytetarëve që të mos qëndrojnë në shtëpi. Ngjarja ka sjellë reagime të shumta, përfshirë dorëheqjen e drejtorit të Policisë së Kosovës, Gazmend Hoxha, suspendime të prokurorëve e policëve, si dhe kërkesat e protestuesve për shkarkimin e ministrave të Drejtësisë dhe të Punëve të Brendshme, si dhe të kryetarit të Pejës, Gazmend Muhaxheri.

Siç raportoi Zhurma më 31 tetor 2026, kryeministri Albin Kurti kishte paralajmëruar masa ndëshkimore disiplinore dhe penale ndaj zyrtarëve që dështuan në mbrojtjen e viktimës, ndërkohë që organizatorët e protestave kanë vijuar presionin ndaj institucioneve për trajtimin e vrasjeve të grave si çështje urgjente kombëtare.