Çfarë diskutoi delegacioni i BQK-së në Bankën Qendrore të Kroacisë?
Guvernatori Ahmet Ismaili ka udhëhequr një delegacion në Zagreb për të diskutuar reformat në sektorin financiar dhe kornizën ligjore të përmbylljes.
ZAGREB — Një delegacion i Bankës Qendrore të Republikës së Kosovës, i kryesuar nga guvernatori Ahmet Ismaili, ka zhvilluar një vizitë zyrtare në Bankën Qendrore të Kroacisë. Delegacioni kosovar u prit në Zagreb nga zëvendësguvernatori kroat Michael Faulend dhe ekipi i tij profesional, me të cilët u diskutua për forcimin e bashkëpunimit dypalësh.
Fokusi kryesor i takimeve teknike ndërmjet ekipeve të dy institucioneve ishte korniza ligjore dhe institucionale e përmbylljes në Kroaci dhe në Bashkimin Evropian. Palët diskutuan gjerësisht për planifikimin dhe testimin e këtij funksioni, përcaktimin e funksioneve kritike financiare, si dhe kërkesat e veçanta që ndërlidhen me standardin e MREL-it.
Gjatë vizitës, Ismaili u takua edhe me zëvendësguvernatoren Sandra Švaljek, me të cilën bisedoi mbi zhvillimet në sektorin bankar, reformat rregullatore dhe përvojën kroate në integrimin evropian. Guvernatori vizitoi gjithashtu Muzeun e Parasë "Moneterra", ku u njoh me historikun monetar të Kroacisë dhe rrugëtimin e saj drejt anëtarësimit në zonën euro.
Banka Qendrore e Kosovës dhe ajo e Kroacisë u pajtuan për zgjerimin e bashkëpunimit në fushat e rimëkëmbjes dhe të përmbylljes bankare. Ky koordinim synon të mbështesë konsolidimin e mëtejshëm të këtyre funksioneve në Kosovë, duke u mbështetur në standardet më të larta dhe praktikat më të mira të Bashkimit Evropian.
Burim: Telegrafi, https://telegrafi.com/guvernatori-i-bqk-se-me-delegacionin-e-tij-zhvillon-vizite-zyrtare-ne-banken-qendrore-te-kroacise/
— Redaksia ZHURMA