Borxhi shtetëror i Kosovës arriti në 1,8 miliardë euro

Auditorja e Përgjithshme e Kosovës Vlora Spanca ka prezantuar në Kuvendin e Kosovës raportin e auditimit vjetor për vitin 2025 mbi menaxhimin e fondeve publike, ku u bë e ditur se borxhi shtetëror në fund të vitit 2025 arriti në 1,8 miliardë euro.

Sipas raportit të paraqitur nga Spanca, dokumenti përmban dy shtylla kryesore që përfshijnë auditimin vjetor financiar të qeverisë për buxhetin 2025 dhe rezultatet e auditimeve individuale të institucioneve publike. Gjatë seancës, shefi i Grupit Parlamentar të Partisë Demokratike të Kosovës, Arian Tahiri, kërkoi që raportimi të shtyhej për shkak të mungesës së kryeministrit dhe ministrit të Financave, por kërkesa e tij nuk kaloi në votim.

Duke elaboruar gjetjet financiare, Spanca bëri të ditur se është evidentuar klasifikim jo adekuat i shpenzimeve në vlerë prej 77,4 milionë eurosh. Prej kësaj shume, 58,5 milionë euro lidhen me pagesat e realizuara në bazë të vendimeve gjyqësore nga kategori jo adekuate buxhetore, kryesisht për përmbushjen e detyrimeve nga kontrata kolektive në nivel komunal, ndërsa pjesa tjetër përfshin buxhetim jo adekuat prej 4,5 milionë eurosh dhe keq-klasifikime prej 14,4 milionë eurosh nga organizatat buxhetore. Për më tepër, Spanca shtoi se është evidentuar mbivlerësimi i pasurive në vlerë prej 33,5 milionë eurosh dhe u identifikuan mangësi të tjera, përfshirë nënvlerësimin e llogarive të arkëtuara në vlerë prej 4,4 milionë eurove, mbivlerësimin e detyrimeve të papaguara në vlerë prej 2,8 milionë euro si dhe mbivlerësimin e detyrimeve dhe kontingjenteve në vlerë afro 30 milionë euro.

Lidhur me gjendjen e përgjithshme të financave publike, Spanca deklaroi se të hyrat buxhetore kanë arritur mbi tre miliardë e 512 milionë euro, duke shënuar një rritje prej rreth 9 për qind krahasuar me vitin 2024. Nga buxheti final prej 3 miliardë e 848 milionë euro janë realizuar 91 për qind, ndërsa shpenzimet buxhetore u rritën gjithashtu për 9 për qind. Sa i përket deficitit buxhetor, ajo tha se kufiri i përcaktuar me ligj u respektua, ku deficiti i planifikuar ishte 224 milionë euro ose rreth 2 për qind e Bruto Produktit Vendor, kurse realizimi përfundimtar ishte rreth 7,8 milionë euro ose 0,07 për qind e Bruto Produktit Vendor.

Në lidhje me borxhin publik, Spanca sërish theksoi se «Borxhi shtetëror në fund të vitit 2025 arriti 1,8 miliardë euro duke shënuar rritje prej 80,4 milionë euro apo 4,6 për qind krahasuar me vitin paraprak (2024). Në raport për BPV, borxhi shtetëror ishte 16,5 për qind – pra brenda kufirit ligjor prej 40 për qind».