Pse iu kthyen emrat e Titos rrugëve të Tetovës pas 20 vjetësh?

SHKUP — Analisti dhe profesori universitar nga Kosova, Blerim Latifi, e ka lidhur vendimin e Gjykatës Kushtetuese për shfuqizimin e emrave shqiptarë të rrugëve në Tetovë me dobësimin politik të shqiptarëve në Maqedoninë e Veriut. Sipas tij, fakti që vendimi u anulua pothuajse dy dekada pas miratimit nuk është rastësi, por pasqyrim i ndryshimit të rrethanave politike.

Në vitin 2007, Komuna e Tetovës emërtoi disa rrugë me emra si "Iliria", "Dëshmorët e Kombit" dhe "Dervish Cara". Gati njëzet vjet më vonë, Gjykata Kushtetuese riktheu emrat e vjetër, përfshirë edhe atë të Titos.

"Pse ky vendim nuk u mor atëherë, por pas pothuajse dy dekadash? Arsyeja është e qartë: shqiptarët sot janë politikisht shumë më të dobët sesa ishin në atë kohë", vlerëson Latifi.

Latifi e zgjeron analizën edhe te çështja e gjuhës shqipe. Ai thekson se protestat e studentëve nuk arritën të shndërrohen në lëvizje më të gjerë politike. Partitë shqiptare, sipas tij, janë më të përçara dhe me më pak peshë se dikur.

Elita kulturore, vazhdon ai, po i ngjan gjithnjë e më shumë elitave të Lindjes së Mesme — duke u marrë me kauza të largëta, ndërsa humbet ndjeshmërinë për çështjet që prekin drejtpërdrejt pozitën e shqiptarëve në vendin e vet. "Shqiptari i Maqedonisë mund të të hidhet në fyt për Palestinën, por kur i ndërrojnë emrin shqip të rrugës para shtëpisë, kthen kokën në anën tjetër", shkruan Latifi.

Nacionalistët maqedonas e dinë këtë gjendje, përfundon ai, prandaj janë futur në punë për t'i shkatërruar të gjitha rezultatet që arritën shqiptarët pas luftës së vitit 2001.

Burim: Tetova Sot, https://tetovasot.com/2026/06/latifi-shfuqizimi-i-emrave-te-rrugeve-pasqyre-e-dobesimit-politik-te-shqiptareve/
— Redaksia ZHURMA