Bekim Sali: Kuvendet janë zemër e procesit të integrimit evropian

Zëvendëskryeministri i Parë dhe Ministri për Çështje Evropiane, Bekim Sali, iu drejtua sot Konferencës së Tretë Parlamentare të Nivelit të Lartë në Shkup, e cila u kushtua bashkëpunimit rajonal dhe rolit të mbikëqyrjes parlamentare në procesin e anëtarësimit në Bashkimin Evropian.

Sali theksoi se kuvendet janë në zemër të procesit të integrimit evropian dhe garantues të llogaridhënies së reformave. Ai deklaroi se integrimi evropian nuk mund të udhëhiqet vetëm nga qeveritë, sepse legjitimiteti demokratik, qëndrueshmëria dhe besueshmëria e procesit varen edhe nga përfshirja aktive e parlamenteve.

Sipas tij, mbikëqyrja efektive parlamentare është e rëndësishme për monitorimin e zbatimit të reformave, transparencën dhe llogaridhëninë institucionale. Kuvendi duhet të ketë rol aktiv në monitorimin e zotimeve reformuese, identifikimin e vonesave dhe kërkimin e rezultateve konkrete nga institucionet.

Ministri vuri theks gjithashtu në nevojë për një konsensus të gjerë politik rreth integrimit evropian, duke vlerësuar se perspektiva evropiane duhet të tejkalojë ciklet zgjedhore dhe interesat partiake. Një pjesë e fjalimit iu kushtua bashkëpunimit parlamentar në Ballkanin Perëndimor dhe diplomacisë parlamentare si mjet për ndërtimin e besimit dhe forcimin e bashkëpunimit rajonal.