Bekim Sali: Integrimi gradual duhet të sjellë përfitime konkrete për qytetarët

Zëvendëskryetari i parë i Qeverisë dhe ministër për Çështje Evropiane, Bekim Sali, ka zhvilluar një takim bilateral me komisioneren evropiane për zgjerim, Marta Kos, gjatë vizitës së tij të punës në Bruksel. Gjatë këtij takimi, palët diskutuan rreth perspektivës evropiane të vendit, zhvillimeve në politikën e zgjerimit të Bashkimit Evropian, si dhe zbatimit të Agjendës së Reformave dhe Planit të Rritjes për Ballkanin Perëndimor.

Ministri Sali theksoi rëndësinë e një procesi zgjerimi më të parashikueshëm dhe të bazuar në merita, duke shtuar se procesi evropian nuk duhet të mbetet vetëm një perspektivë politike. «Integrimi evropian nuk duhet të mbetet vetëm një perspektivë politike. Ai duhet të përkthehet në mundësi reale për qytetarët, ekonominë dhe bizneset tona. Reformat që zbatojmë duhet të na afrojnë gradualisht me tregun, programet dhe politikat e Bashkimit Evropian», deklaroi ai.

Në fokus të bisedimeve ishin edhe përfitimet e prekshme nga integrimi gradual, përfshirë pjesëmarrjen në Zonën e Vetme të Pagesave në Euro, zgjerimin e modelit të roamingut dhe bashkëpunimin digjital. Ndërkohë, komisionerja Marta Kos theksoi domosdoshmërinë e ndryshimeve kushtetuese si hapi i radhës që duhet ndërmarrë për të avancuar në rrugën evropiane.