Begaj thërret partitë parlamentare më 30 tetor për datën e zgjedhjeve 2027

Presidenti i Republikës, Bajram Begaj, ka ftuar përfaqësuesit e grupeve parlamentare në një takim konsultativ më 30 tetor, për të diskutuar mbi caktimin e datës së zgjedhjeve vendore të vitit 2027. Ftesa u është drejtuar të gjitha subjekteve politike që kanë përfaqësim me deputetë në Kuvend.

Diskutimet ndërmjet kreut të shtetit dhe forcave politike do të zhvillohen në Pallatin e Brigadave. Sipas Kodit Zgjedhor, data e ardhshme e votimeve për pushtetin vendor mund të përzgjidhet të jetë një nga ditët e diel, në periudhën mes 15 prillit dhe 15 majit.

Pas përfundimit të këtyre konsultimeve, presidenti pritet të nxjerrë dekretin zyrtar për caktimin e datës së votimeve në përputhje me afatet ligjore, ku afati i fundit për këtë dekretim është përcaktuar data 7 nëntor.