BE: Dhuna ndaj grave në Kosovë kërkon mbështetje më të madhe

Bashkimi Europian vlerëson në raportin e fundit vjetor se dhuna me bazë gjinore mbetet e përhapur në Kosovë, duke kërkuar mbështetje efektive dhe adekuate për viktimat. Sipas raportit të Bashkimit Europian, fenomenet negative përfshijnë edhe dhunën kibernetike që prek gratë e reja dhe ato në jetën publike, ndërsa dhuna në familje mbetet forma më e raportuar.

Institucionet e vendit kanë ndërmarrë hapa të rëndësishëm, pasi Ministria e Drejtësisë publikoi një vlerësim afatmesëm të strategjisë për dhunën me bazë gjinore pas një procesi konsultimi, ndërsa Kosova ka miratuar të gjitha aktet nënligjore në përputhje me Ligjin Kornizë. Raporti i Bashkimit Europian thekson se roli i Koordinatorit Kombëtar është përcaktuar sipas dispozitave të Konventës së Stambollit, por kërkohet personel dhe programe të mjaftueshme për zbatim efektiv. Gjithashtu, është krijuar një bazë e integruar e të dhënave për rastet e dhunës në familje të ndarë sipas gjinisë, moshës dhe përkatësisë etnike, ku të dhënat ofrohen nga nëntë institucione, por regjistrohen në mënyrë jo të njëtrajtshme dhe nuk përfshijnë të gjitha format e dhunës me bazë gjinore.

Pavarësisht rritjes së financimit për shërbimet e specializuara të mbështetjes për viktimat, sistemi i parandalimit dhe mbrojtjes mbetet i pamjaftueshëm, sipas vlerësimit të Bashkimit Europian, i cili shton se duhet planifikim sistematik dhe shumëvjeçar për vazhdimësi. Raporti veçon se programet e rehabilitimit për kryerësit e dhunës janë në fuqi, kurse reagimet e zyrtarëve publikë, institucioneve dhe organizatave për të drejtat e grave ndihmojnë në sfidimin e diskriminimit, stereotipave dhe paragjykimeve. Organizatat për të drejtat e grave kanë luajtur rol kritik në avancimin e barazisë gjinore, ndonëse kontributi i tyre afatgjatë në procesin legjislativ dhe monitorim është ndikuar nga mospërputhjet në proceset e konsultimit të Qeverisë.