Barcelona i vendos ultimatum Atletico Madridit për Alvarez

BARCELONA — Barcelona ka hyrë në fazën vendimtare të garës për sulmuesin e Atletico Madridit, Julian Alvarez, dhe pritet të marrë vendim përfundimtar brenda pak ditësh. Sipas gazetës spanjolle AS, presidenti i klubit katalanas, Joan Laporta, ka bërë të qartë se oferta e Barcelonës nuk do të qëndrojë e hapur pafundësisht.

Fundi i korrikut dhe fillimi i gushtit janë përcaktuar si periudha kyçe për të vendosur nëse negociatat vazhdojnë apo katalunasit drejtohen nga një objektiv tjetër. Problemi kryesor mbetet qëndrimi i Atletico Madridit, që ka insistuar se Alvarez nuk është në shitje, pavarësisht ofertave të mundshme deri në 200 milionë euro.

Barcelona e konsideron argjentinasin zgjedhjen ideale për sulmin, falë aftësisë për të bërë presion, fleksibilitetit taktik dhe intensitetit në lojë. Trajneri Hansi Flick kërkon qartësi për repartin ofensiv para fillimit të sezonit, pasi dëshiron që skuadra të përgatitet me plan të qartë para mbylljes së merkatos.

Nëse bisedimet për Alvarez mbeten të bllokuara, Barcelona ka tashmë një alternativë në listë për sulmin. Ditët në vijim pritet të tregojnë nëse katalunasit do të vazhdojnë të insistojnë për yllin argjentinas apo do të ndryshojnë drejtim.

Burim: Insajderi
— Redaksia ZHURMA