Tifozi sllovak pretendon se u nxorr nga stadiumi pasi festoi golin e Mbappes

Tifozi sllovak i Real Madridit, Frantisek Vavrek, pretendon se ai dhe djali i tij 18-vjeçar, Denis, u nxorën nga tribunat e stadiumit Camp Nou pasi festuan golin e Kylian Mbappes në ndeshjen El Clasico, ku madrilenët fituan me rezultat 2-1 ndaj Barcelonës. Vavrek tha se kishte paguar gjithsej 5,600 euro për katër bileta të kategorisë së parë, me çmim prej 1,400 eurosh për secilën, për të festuar ditëlindjen e djalit të tij.

Siç raportoi Zhurma më 26 tetor 2026, Real Madridi mposhti Barcelonën me rezultat 2-1 në ndeshjen e javës së dhjetë në La Ligë me dy golat e realizuar nga Kylian Mbappe.

Sipas rrëfimit të Vavrekut për gazetën spanjolle Marca, ai kishte udhëtuar nga Presovi i Sllovakisë rreth 300 kilometra deri në Budapest për të marrë fluturimin drejt Barcelonës. Me ta ishin edhe miqtë e familjes nga Kroacia, Krunoslav Pipinic dhe djali i tij Kresimir. Vendet e tyre ndodheshin në sektorin 113 mes tifozëve të Barcelonës. Vavrek tregoi se sigurimi në hyrje nuk i lejoi të hynin me fanellat e Real Madridit dhe u sugjeroi t'i hidhnin në koshin e mbeturinave. Ata i futën fanellat për të kaluar kontrollin dhe i veshën 20 minuta para ndeshjes, duke i mbajtur veshur për afërsisht një orë.

Sipas tifozit sllovak, incidenti ndodhi rreth minutës së 40-të pasi Mbappe shënoi golin e parë. Ai dhe djali i tij u ngritën në këmbë e u përqafuan, por rreth një duzinë pjesëtarësh të sigurimit i larguan nga tribunat. Vavrek deklaroi se gjatë largimit disa spektatorë i fyen dhe i fishkëllyen. Pasi sigurimi komunikoi me eprorët, atyre iu komunikua se nuk mund t'u garantohej siguria nga tifozët vendas po të ktheheshin. Më pas ndërhyri policia, e cila kreu kontrolle dokumentesh për 45 minuta dhe hartoi raporte ku sjellja e tyre cilësohej si provokim apo nxitje për dhunë, pretendime këto që Vavrek i kundërshton duke kërkuar shqyrtimin e pamjeve filmike.

Vavrek tha se e ndoqi pjesën e mbetur të ndeshjes në telefon celular brenda një taksie gjatë rrugës për në apartament. Ai pretendon se kërkoi rimbursimin e parave, por u udhëzua të paraqiste një ankesë zyrtare te me shkrim te klubi i Barcelonës.

«Ne nuk kryem asnjë akt dhune, nuk kërcënuam askënd dhe as nuk nxitëm dhunë. Thjesht festuam golin duke u ngritur në këmbë dhe duke përqafuar njëri-tjetrin», deklaroi Vavrek për gazetën Marca. Ai shtoi gjithashtu: «Na thanë se shumë tifozë të Barcelonës na kishin njohur tashmë dhe se nuk mund të garantonin sigurinë tonë. Kishin frikë se mund të na sulmonin nëse ktheheshim në të njëjtat vende».