Bajrami: Procesi në Hagë prek esencën e shtetësisë së Kosovës

Akademiku Arsim Bajrami ka deklaruar se gjykimi ndaj ish-krerëve të Ushtrisë Çlirimtare të Kosovës në Hagë përbën një proces jetik për historinë dhe të ardhmen e vendit. Gjatë një paraqitjeje televizive, ai ka theksuar se ky nuk duhet trajtuar si një çështje thjesht individuale, pasi ndikon te mënyra se si faktori ndërkombëtar e interpreton shtetndërtimin dhe luftën për liri të Kosovës.

Sipas Bajramit, procesi prek esencën e shtetësisë dhe kërkon një pozicionim të qartë e të vendosur shtetëror. Ai ka shtuar se nuk po gjykohen ushtarë të zakonshëm, por themelues të një lëvizjeje patriotike me kontribut substancial në vend. Lidhur me Ligjin për Dhomat e Specializuara, ai ka vlerësuar se procedura e votuar në Kuvend duhet të përfundojë për t'u dërguar te presidentja për shpallje, duke paralajmëruar se ndërhyrjet apo tërheqjet politike do ta vendosnin shtetin në pozitë të papërcaktuar.