Arrestohet një person pranë Shtëpisë së Bardhë me armë në makinë

Shërbimi Sekret Amerikan arrestoi një burrë të enjten në mbrëmje pranë Shtëpisë së Bardhë, pasi sipas Departamentit të Sigurisë Kombëtare (DHS) ai kishte kërcënuar se do të vriste Presidentin Donald Trump. Oficerët e vëzhguan të dyshuarin teksa sillej në mënyrë të dyshimtë brenda një automjeti të parkuar në Constitution Avenue në Uashington. Gjatë kontrollit, autoritetet zbuluan se makina ishte raportuar e vjedhur dhe se brenda saj gjendeshin tre armë zjarri, përfshirë një pushkë, si dhe dhjetëra fishekë.

I dyshuari u identifikua si shtetasi venezuelian Ronny Yordrix Guanipa Chrinos, i cili ndodhet nën paraburgimin e Shërbimit të Marshallëve të SHBA-së dhe përballet me akuza për posedim të armëve të rrezikshme e vjedhje. Sipas DHS, Chrinos kishte hyrë ilegalisht në Shtetet e Bashkuara përmes Teksasit në muajin mars të vitit 2024. Ky rast pason një sërë arrestimesh të ngjashme që nga rikthimi i Trump në Shtëpinë e Bardhë në janar të vitit 2025.

Drejtori i Shërbimit Sekret, Sean Curran, tha se «ky incident pasqyron mjedisin e kërcënimit të shtuar në të cilin veprojmë, si dhe numrin e vazhdueshëm të individëve të armatosur që tërhiqen nga kompleksi i Shtëpisë së Bardhë». Nga ana e tij, sekretari i Sigurisë Kombëtare, Markwayne Mullin, u shpreh se falë oficerëve të guximshëm ky person u ndalua para se të mund të dëmtonte dikë.