Arlind Murtezani zgjidhet kryetar i Lidhjes Shqiptare në Tetovë

TETOVË — Dega e Lidhjes Shqiptare në Tetovë mbajti Kuvendin Zgjedhor ku kuvendarët votuan njëzëri Arlind Murtezanin, i cili është aktualisht këshilltar komunal në Komunën e Tetovës, për kryetar të degës, duke zgjedhur gjithashtu kryesinë e re. Pas zgjedhjes së tij, Murtezani u bëri thirrje strukturave për mobilizim maksimal dhe u zotua për rikthimin e partisë në skenën politike, duke deklaruar se VLEN-i dhe BDI-ja po bëjnë garë se cila do të jetë e keqja më e madhe për shqiptarët. «Në këto rrethana, Lidhja Shqiptare mbetet alternativa e vetme për shqiptarët që kërkojnë dinjitet, përfaqësim të vërtetë dhe një politikë në shërbim të qytetarëve», tha Murtezani. Punimet e këtij kuvendi u ndoqën nga afër edhe nga kryetari i partisë Ziadin Sela bashkë me kryetarin e kuvendit të saj, deputetin Elmi Aziri, ndërsa të pranishëm ishin edhe anëtarët e kryesisë Vjollcë Berisha, Adnan Neziri dhe Bekim Tateshi. Sela uroi kryetarin e ri duke theksuar rëndësinë e kësaj dege dhe ringritjen e partisë, kurse ky kuvend hapi procesin e mbledhjeve për të gjitha degët dhe strukturat tjera lokale në mbarë vendin.