Mësuesi nga Kosova kërkon ndihmë për mjekim në Zvicër

Xhevat Murati, një mësues i pensionuar nga Kosova, po përballet me një sëmundje të rëndë pasi kanceri është përhapur shpejt edhe pas dy ndërhyrjeve të mëparshme kirurgjikale. Pasi mjekët në Kosovë njoftuan se mundësitë e trajtimit ishin të kufizuara, mbesa e tij, Besa Berisha-Murati, kontaktoi Spitalin Universitar të Cyrihut për të shqyrtuar mundësinë e një operacioni të ri. Meqenëse ai nuk posedon sigurim shëndetësor zviceran, familja duhet të mbulojë vetë të gjitha shpenzimet e mjekimit.

Për ekzaminimet fillestare familja kishte paguar paraprakisht tetë mijë franga, ndërsa për vetë operacionin spitali ka kërkuar një depozitë prej 98 mijë e 100 frangash zvicerane. Spitali ka sqaruar se kjo shumë përbën vetëm depozitën paraprake dhe jo çmimin përfundimtar, çka nënkupton se kostot mund të rriten më tej. Për të siguruar mjetet e nevojshme brenda afatit, familjarët u detyruan të mblornin para nga rrethi i tyre dhe të merrnin hua shuma të konsiderueshme.

Për të shmangur një barrë të rëndë borxhesh pas mjekimit, mbesa e tij ka hapur një fushatë sensibilizuese në platformën GoFundMe për mbledhjen e donacioneve. Gjatë publikimit të raportimit nga mediumi zviceran Blick, fushata kishte arritur të mblidhte mbi 11 mijë franga përmes afër 160 donacioneve, ndërsa objektivi fillestar ishte vendosur në 50 mijë franga.