Si mund të aplikojnë punëtorët e sektorit jo-publik për 100 eurot?

PRISHTINË — Është hapur aplikimi për subvencionimin e punëtorëve të sektorit jo-publik në Kosovë. Të gjithë të interesuarit mund të aplikojnë deri më 5 qershor 2026 përmes formularit online të publikuar nga Administrata Tatimore e Kosovës.

Lajmin e bëri të ditur ministri në detyrë i Financave, Hekuran Murati. Aplikimi bëhet individualisht, ndërsa secili i punësuar duhet të sigurojë që të dhënat e plotësuara të jenë të sakta. Llogaria bankare duhet të jetë obligativisht në emër të përfituesit; aplikimet me gabime do të refuzohen.

Të drejtë aplikimi kanë punëtorët në sektorin privat, në organizata joqeveritare, si dhe në entitete publike që nuk paguhen nga buxheti përmes listës së pagave — përfshirë ndërmarrjet publike dhe Radiotelevizionin e Kosovës. Për të përfituar, aplikuesit duhet të kenë të ardhura mujore bruto deri në 1,000 euro dhe të jenë të deklaruar në ATK nga punëdhënësi për muajin prill, me afat deklarimi deri më 15 maj 2026.

Burim: Zëri
— Redaksia ZHURMA