Apeli anulon dënimin me 12 vjet e gjashtë muaj burg për Srdjan Lazoviqin
Gjykata Themelore në Prishtinë e kishte dënuar atë me 12 vjet e gjashtë muaj burgim në shkurt të këtij viti.
PRISHTINË — Gjykata e Apelit e Kosovës ka anuluar aktgjykimin dënues ndaj Srdjan Lazoviqit, i cili ishte dënuar me 12 vjet e gjashtë muaj burgim për krime lufte kundër popullsisë civile. Vendimi i shkallës së dytë e kthen çështjen në rigjykim, pas aprovimit të ankesave të mbrojtjes dhe vetë të akuzuarit.
Sipas vendimit, Gjykata Themelore në Prishtinë kishte shpallur fajtor Lazoviqin në shkurt të këtij viti për krime lufte në bashkëkryerje. Megjithatë, Apeli gjeti shkelje esenciale të dispozitave të procedurës penale. Këto shkelje, sipas shkallës së dytë, kanë ndikuar drejtpërdrejt në vërtetimin e gabuar dhe jo të plotë të gjendjes faktike.
Apeli ka vlerësuar se shkalla e parë administroi prova të shumta materiale, por nuk i trajtoi apo vlerësoi ato në arsyetim. Gjykata nuk dha arsye për vlerën e tyre provuese dhe nuk trajtoi raportin e Agjencisë së Kosovës për Forenzikë dhe dy raportet e ekspertëve të huaj që lidhen me identifikimin e të akuzuarit.
Mbrojtja e Lazoviqit, e përfaqësuar nga avokatja Feride Xani, kishte pretenduar shkelje të shumta gjatë procesit fillestar. Tashmë Gjykata Themelore në Prishtinë, konkretisht Departamenti Special, është e detyruar të trajtojë të gjitha raportet forenzike dhe provat e administruara për të eliminuar paqartësitë mbi identifikimin e të akuzuarit në procesin e rigjykimit.
Burim: Lajmi.net
— Redaksia ZHURMA