Ademi: Diskriminim në spital pas 80 punësimeve pa shqiptarë

KUMANOVË — Rreth 80 punësimet e reja të realizuara në Spitalin e Kumanovës kanë nxitur debate të forta politike rreth përfaqësimit etnik, pasi sipas të dhënave të publikuara nuk figuron asnjë person i përkatësisë etnike shqiptare në mesin e të punësuarve, ndërkohë që drejtori Sasho Stoshevski vazhdon të heshtet dhe nuk ka qenë i kapshëm për media gjatë gjithë ditës.

Procesi i kontestuar i punësimit në këtë institucion shëndetësor është zhvilluar në disa faza të ndryshme kohore, ku fillimisht dhjetë persona kanë marrë vendime para dy muajsh, më pas janë angazhuar shtatë persona me kontrata para një muaji, shtatë të tjerë para një jave dhe së fundmi janë angazhuar edhe 62 persona të tjerë me kontrata. Spitali i Kumanovës nën menaxhimin e Sasho Stoshevskit ka qenë në shënjestër edhe muaj më parë për shkak të avancimeve dhe emërimeve nëpër klinikat e këtij spitali, ku megjithëse ishte paralajmëruar rregullimi i përfaqësimit dhe respektimi i meritokracisë, drejtori nuk kishte ndërmarrë asnjë veprim. Në nivel qendror dhe lokal janë realizuar qindra punësime, ndërsa përfaqësimi i drejtë dhe adekuat nuk është respektuar pothuajse në asnjë prej institucioneve të shtetit, ndërkohë që Gjykata Kushtetuese e Maqedonisë së Veriut më 9 tetor 2024 e shfuqizoi balancuesin që rregullonte përfaqësimin e komuniteteve, pas nismës së Komisionit Shtetëror për Parandalimin e Korrupsionit që pretendonte se kishte abuzime.

Sipas opozitës, ky rezultat dhe përjashtim i shqiptarëve vjen si pasojë e premtimeve të rrejshme të VLEN-it se balancuesi do të kthehej në fuqi ligjore, ndërsa deputetja e Lidhjes Shqiptare, Ilire Dauti, kërkoi që të votohet propozim-ligji i tyre dhe e ftoi zëvendëskryeministrin Bekim Sali në debat për t'i ballafaquar të dy propozimet. Zëvendëskryeministri Bekim Sali në fillim të muajit tetor theksoi se opozita e kundërshton propozim-ligjin për shkak se vjen nga VLEN-i dhe hodhi poshtë akuzat se ai është në dëm të shqiptarëve, duke kërkuar mbështetjen e të gjitha partive politike. Ndërkaq, ministri i Ekonomisë dhe Punës, Besar Durmishi, tha se ai dhe partia e tij do ta shqyrtojnë këtë vendim të drejtorit në nivel partishë dhe brenda komisionit kadrovik, duke shtuar se në këtë institucion dhe gjetiu do të ketë punësime të reja të rajonit dhe qytetit të Kumanovës, por edhe përreth vendit.

Procedurat parlamentare për ligjin e ri kanë përfshirë miratimin nga Qeveria më 7 prill dhe dorëzimin në Kuvend më 8 maj, ku opozita në qershor dorëzoi 31 amendamente duke kërkuar kuota etnike dhe masa ndëshkuese, ndërsa Komisioni për Marrëdhënie Ndërmjet Bashkësive më 4 qershor vendosi që propozimi të kalojë me shumicë të dyfishtë të thjeshtë të njohur si badenteri i vogël, derisa më 16 korrik propozim-ligji nuk u vu në votim në seancën plenare dhe mbeti pa epilog, ndërsa Ligji për Përfaqësim të Drejtë dhe Adekuat vazhdon të jetë i bllokuar në Kuvend.

Duke kritikuar situatën e krijuar, Arbër Ademi nga BDI deklaroi se «Ju po e shihni se shqiptarët po përjashtohen po diskriminohen, ky Konkursi në spitalin e Kumanovës ku mbi 60 maqedonas dhe zero shqiptarë janë pranuar është në vazhdën e konkurseve që po realizohen gjithandej, kjo është ajo që e shfuqizuan balancuesin, që thoshin këta të vlenit se balancuesin do ta avancojmë do ta bëjmë me ligj, ja po i shihni pasojat».

Nga ana e tij, ministri Besar Durmishi theksoi se «Normalisht që edhe aty do të ketë punësime edhe të rajonit, konkretisht të qytetit të Kumanovës, por edhe përreth vendit».