Nikolloski: Autostrada Kërçovë-Ohër përfundon plotësisht deri në maj
Zëvendëskryeministri Nikolloski njoftoi nga Ohri se segmenti më i vështirë i autostradës pritet të lëshohet në funksion në javët e ardhshme.
Redaksia ZHURMA · · 2 min lexim
OHËR — Zëvendëskryeministri dhe ministri i Transportit, Aleksandar Nikolloski, bëri të ditur nga Kërçova se punimet ndërtimore në segmentin nga fshati Izvor deri te Vërbjani në komunën e Debarcës kanë përfunduar plotësisht dhe pritet të hapen për qarkullim gjatë javëve të ardhshme. Sipas tij, qeveria po i përmbahet premtimit që e gjithë autostrada të jetë plotësisht e hapur deri në fund të majit, e pajisur me të gjithë dokumentacionin e nevojshëm.
Nikolloski theksoi se janë hapur dy tubat e tunelit, me gjatësi prej 1.100 metrash dhe 1.990 metrash, të cilët i cilësoi si tubat më të gjatë të tunelit në vend, ndërsa kanë përfunduar edhe katër galeritë, trupi i rrugës, urat dhe viaduktet. Aktualisht po kryhen testet e nevojshme për zbatimin e direktivës evropiane për sigurinë në komunikacion brenda tuneleve, një praktikë që zbatohet për herë të parë në rajon.
Sa i përket projekteve që ndërtohen nga kontraktorin “Behtel dhe Enka”, ministri sqaroi se përparimi ndryshon sipas akseve, ku në autostradën Prilep–Manastir punimet e dheut kanë arritur mbi 80 për qind, në aksin Tetovë–Gostivar janë në 65 për qind, ndërsa në segmentin nga Gostivari në Bukojçan kanë arritur në 60 për qind, ndërsa pjesa tjetër drejt Bukojçanit sapo ka filluar të ndërtohet. Për trasën e ardhshme Trebenishtë–Qafë Thanë, ai theksoi se po diskutohet për gjetjen e variantit më optimal që mbron interesat e gjithë rajonit, duke shtuar se vendimi përfundimtar mbi rrugën do t'i lihet ekspertëve të mjedisit dhe të ndërtimit.
