Zjarret në vend: 5 vatra aktive, 2 helikopterë të FA në operacion

Ministria e Mbrojtjes ka përditësuar situatën e zjarreve në vend deri në orën 20:00, duke raportuar 8 vatra zjarri në territor. Prej tyre, 5 mbeten aktive, 2 janë nën mbikëqyrje dhe 1 është shuar plotësisht.

Në mbështetje të operacioneve tokësore janë aktivizuar 2 helikopterë të Forcave të Armatosura. Angazhimi më i gjerë tokësor është regjistruar në qarkun Dibër, ku në Qafë të Helmës kanë operuar 27 forca, në Vajkal dhe Sllatinë, me mbështetje ajrore për shkak të erës dhe terrenit malor.

Në Malin e Dajtit, pas riaktivizimit të 3 vatrave, janë angazhuar 20 forca zjarrfikëse dhe të AZM-së, të mbështetura nga 1 helikopter i FA, ndërsa vatra mbetet aktive. Ndërhyrja në Ungrej të Lezhës përfundoi me shuarjen e plotë të vatrës, ndërsa në Elbasan vatrat në malin e Dardhës dhe malin e Qukësit mbahen nën mbikëqyrje.

Ky përditësim vjen pas raportimit të mëparshëm për 31 zjarre në hapësira të hapura, ku tre vatra mbeteshin aktive.