"Washington Post" vlerëson Shqipërinë — nuk është thjesht alternativë e lirë
Gjatë vitit 2024 vendi priti mbi 11.6 milionë vizitorë të huaj, duke shënuar një rritje prej 82% në krahasim me periudhën e para pandemisë në vitin 2019.
TIRANË — Gazeta e njohur amerikane "The Washington Post" ka vlerësuar turizmin në Shqipëri, duke e përshkruar atë si një destinacion unik që ofron një identitet të vetin autentik. Sipas reportazhit të saj, Shqipëria nuk duhet parë thjesht si një alternativë e lirë ndaj fqinjëve të saj mesdhetarë si Italia, Greqia apo Kroacia.
Gazetarja e prestigjiozes amerikane ka përshkruar përvojën e saj njëjavore në veri dhe jug të vendit. Ajo ka veçuar mikpritjen e ngrohtë në bujtinat familjare të Shkodrës dhe qetësinë e natyrës në fshatin Rragam, duke e cilësuar këtë si një përvojë të paharrueshme që e dallon vendin nga vendet me turizëm masiv.
Reportazhi më pas ndalet në plazhet e Himarës dhe Livadhit, ku vërehet se zhvillimi i shpejtë dhe ndërtimi i hoteleve të reja po ndryshojnë peizazhin bregdetar. Megjithatë, Shqipëria shënoi një rritje mbresëlënëse duke pritur 11.6 milionë turistë të huaj në vitin 2024, një rritje prej 82% krahasuar me vitin 2019.
Në përfundim, shkrimi nënvizon se suksesi i vërtetë i Shqipërisë nuk qëndron te krahasimi me fqinjët, por te ruajtja e identitetit të saj. Autoritetet vendase tani synojnë zhvillimin e një turizmi të qëndrueshëm, duke shmangur mbingarkesat e mëdha dhe duke u fokusuar te vlerat dhe përvojat unike që ofron jeta në fshat.
Burim: Gazeta Tema
— Redaksia ZHURMA
