Rama: Shqipëria synon mbylljen e negociatave dhe grupkapitujve deri në 2027
Kryeministri deklaroi nga Irlanda se vendi është në rrugën e duhur dhe më afër se kurrë anëtarësimit në Bashkimin Europian.
Redaksia ZHURMA · · 1 min lexim
Gjatë një vizite në Irlandë, ku ishte i ftuar nga Instituti i Çështjeve Ndërkombëtare dhe Europiane për të folur mbi udhëtimin europian të vendit, kryeministri Edi Rama theksoi se vendi po ecën në rrugën e duhur drejt integrimit. Sipas tij, Shqipëria ndodhet në një moment përcaktues dhe shikon një derë të hapur për t'u bërë pjesë e familjes europiane, ndërsa procesi po ecën sipas rregullave dhe ekziston një dakordësi me Komisionin.
Rama u shpreh se qeveria është besimplotë për mbylljen e të gjithë grupkapitujve dhe se fundi i vitit 2027 është një synim i mundur për përmbylljen e negociatave. Kreu i ekzekutivit shtoi se nga ana e vendit duhet bërë maksimumi për të përmbushur pritshmëritë, duke përmendur se procesi përfshin 27 shtete anëtare ku disa vende, si Franca, kërkojnë shumicë prej dy të tretave në parlament ose referendum për ratifikimin e traktatit.
