Vlora Çitaku pret në takim ambasadorin britanik Jonathan Hargreaves

Ushtruesja e detyrës së kryetares së Partisë Demokratike të Kosovës, Vlora Çitaku, ka pritur në takim ambasadorin e Mbretërisë së Bashkuar në Kosovë, Jonathan Hargreaves, për të biseduar rreth zhvillimeve aktuale politike. Gjatë këtij takimi, Çitaku e ka cilësuar pozitivisht përmbylljen e formimit të institucioneve dhe ka vlerësuar se vëmendja duhet të drejtohet te sfidat e qytetarëve.

«Kosova përballet me sfida të rëndësishme që kërkojnë vëmendje të plotë institucionale, përgjegjësi dhe angazhim për të përmirësuar jetën e qytetarëve», u shpreh Çitaku. Temë e diskutimit ishte gjithashtu procesi gjyqësor pranë Dhomave të Specializuara në Hagë, ku ajo kërkoi standarde të larta drejtësie dhe vendimmarrje të bazuar në prova, e të pavarur nga ndikimet politike.

Në këtë takim u theksua sërish rëndësia e partneritetit ndërmjet Kosovës dhe aleatëve, si dhe u rikonfirmua përkushtimi për rrugëtimin euroatlantik dhe synimet për anëtarësim në Bashkimin Evropian dhe NATO.