Franca përfshihet nga protestat masive dhe greva e përgjithshme

Një valë e re protestash masive ka përfshirë Francën, ku mbi 270,000 qytetarë kanë dalë në sheshe për të shprehur pakënaqësinë ndaj kostos së jetesës, problemeve në arsim dhe gjendjes së shërbimeve publike. Këto zhvillime përbëjnë një sfidë të re për administratën e presidentit Emmanuel Macron, teksa pakënaqësitë sociale janë shndërruar në trazirat më serioze të viteve të fundit në vend.

Në kryeqytet, marshimi nisi me atmosferë festive ku qytetarët kënduan himnin kombëtar dhe shfaqën automjete të ngjashme me ato të karnavaleve, por situata u tensionua pas dy orësh kur grupe protestuesish u përleshën me efektivët e rendit, të cilët reaguan me gaz lotsjellës. Përplasje të ngjashme u shënuan gjithashtu në qytetin e Lionit, ku forcat speciale ndërhyen ndaj protestuesve me fytyra të mbuluara, ndërsa pranë Tuluzës u regjistrua një zjarr në një shkollë të mesme si pasojë e hedhjes së mjeteve piroteknike, duke detyruar evakuimin e nxënësve dhe stafit.

Lidhur me këtë incident, ministri i Arsimit, Edouard Geffray, e quajti ngjarjen skandal absolut dhe sjellje kriminale. Paralelisht me tubimet, greva njëditore e sektorit publik solli mbylljen e Kullës Eifel, ndërsa në shkallë vendi ajo përfshiu mësuesit me rreth 15 për qind pjesëmarrje sipas ministrisë, si dhe punonjës të energjisë, duke ulur prodhimin e centraleve bërthamore pa shkaktuar megjithatë probleme madhore në transport.