Vatra kërkon ndërhyrjen e Trumpit për lirimin e ish-krerëve të UÇK-së
Kreu i federatës Elmi Berisha i ka dërguar letër presidentit amerikan, duke argumentuar se procesi po shfrytëzohet për propagandë nga Serbia dhe Rusia.
NEW YORK — Federata Pan-Shqiptare e Amerikës Vatra i ka dërguar një letër zyrtare presidentit të Shteteve të Bashkuara, Donald Trump, duke kërkuar ndërhyrjen e tij diplomatike për të ndalur gjykimin ndaj ish-krerëve të Ushtrisë Çlirimtare të Kosovës (UÇK) në Gjykatën Speciale të Hagës.
Në letrën e nënshkruar nga kryetari i organizatës, Elmi Berisha, theksohet se ky proces gjyqësor rrezikon të rishkruajë historinë e luftës çlirimtare dhe të dëmtojë partneritetin strategjik mes Kosovës dhe SHBA-së. Berisha vuri në dukje se lufta nuk ishte konflikt mes palëve të barabarta, por mbrojtje ndaj fushatës së spastrimit etnik të regjimit të Sllobodan Millosheviqit.
Sipas letrës, gjatë konfliktit u vranë mbi 15 mijë civilë shqiptarë dhe u dëbuan mbi një milion të tjerë. Organizata argumenton se Serbia dhe Rusia po e përdorin procesin në Hagë për propagandë kundër shtetësisë së Kosovës dhe se mbrojtja e atdheut nga gjenocidi nuk duhet të konsiderohet kurrë krim.
Në këtë kuadër, federata kërkon lirimin e menjëhershëm të Hashim Thaçit, Kadri Veselit, Jakup Krasniqit dhe Rexhep Selimit. Berisha i bën thirrje Uashingtonit të rishikojë mandatin e Dhomave të Specializuara, duke kujtuar se procesi cenon kujtesën e viktimave dhe drejtësinë historike në rajon.
Burim: Lajmi.net
— Redaksia ZHURMA