Nënë e bir shqiptarë humbën jetën pas përplasjes me kamion në Greqi
Viktimat 43 dhe 21 vjeç po udhëtonin drejt punës kur u përplasën ballë për ballë me një kamion në zonën e Paleokomit.
PALEOKOM — Një nënë 43 vjeçe dhe djali i saj 21-vjeçar, me origjinë nga Shqipëria, humbën jetën mëngjesin e së premtes në Greqi. Automjeti me të cilin ata udhëtonin u përplas ballë për ballë me një kamion në një aksident tragjik rrugor që ka tronditur zonën.
Sipas të dhënave paraprake nga mediat greke, në timonin e automjetit ndodhej 21-vjeçari, ndërsa nëna e tij udhëtonte në sediljen e parë. Përplasja ishte aq e fortë sa të dy humbën jetën në vendngjarje.
Familja shqiptare jetonte prej vitesh në zonën e Paleokomit, ku kishte ndërtuar jetën me punë dhe përkushtim. Nënë e bir ishin nisur drejt një kompanie të pasurive të paluajtshme në plazhin e Ofrynit, ku punonin të dy së bashku në të njëjtin sektor.
Pas kësaj humbjeje të papritur, në familje kanë mbetur vetëm babai dhe vajza. Autoritetet greke janë duke vazhduar hetimet e tyre për të përcaktuar shkaqet e plota të aksidentit, duke analizuar edhe kamerën e sigurisë që ndodhej e montuar në kamion.
Burim: Shekulli
— Redaksia ZHURMA
