Çfarë rol luajnë gratë në 'Revolucionin e Flamingove'?

TIRANË — Dhjetëra gra dhe vajza kanë marrë role kyçe në koordinimin dhe ndërtimin e identitetit publik të të ashtuquajtur “Revolucionit të Flamingove”, protesta maratonë më e madh në Shqipëri gjatë tre dekadave të fundit. Aktivistet po udhëheqin komunikimin dhe organizimin e një lëvizjeje që kërkon dorëheqjen e kryeministrit Edi Rama dhe anulimin e ligjeve që favorizojnë ndërtimet në zonat e mbrojtura.

Sidorela Vatnikaj, një nga zërat e podiumit, kujton se revolta nisi pas ngjarjes së 30 majit në Zvërnec, ku një protestues u tërhoq zvarrë nga rojet private. Ajo shpjegon për BIRN se ajo që nisi si një mbledhje e vogël përballë Drejtorisë së Policisë, u shndërrua shpejt në një “lum” të pakontrollueshëm të revoltes qytetare, duke krijuar një ligjërim të ri politik për një vend pa autokratë dhe oligarkë.

Lëvizja nuk ka një lider të vetëm apo një parti drejtuese, por mbahet gjallë nga mijëra qytetarë dhe një rrjet koordinatorësh. Luçiana Kokaj, e cila u kthye nga Italia tre muaj më parë, u bashkua me protestat pasi pa ngjashmërinë midis situatës në Zvërnec dhe luftës së saj në Rrjoll të Shkodrës për mbrojtjen e tokave familjare nga ndërtimi i një resorti turistik.

Kokaj thekson se gratë dhe vajzat kanë marrë përsipër detyra logjistike kritike, si sigurimi i mikrofonëve, furnizimi me ujë dhe nxjerrja e lejeve për protestat. Sipas saj, prania e gjysheve, nënave dhe vajzave blogere i ka dhënë lëvizjes një energji të re dhe një imazh paqësor, duke e bërë protestën më tërheqëse dhe më të forta në prezantim.

Vatnikaj beson se përfshirja e grave në vijën e parë të përballjes nuk po shkatërron vetëm një sistem autokratik, por po prodhon një imagjinatë të re politike që emancipon të gjithë shoqërinë. Ajo vërejt mënyrën se si turma, që zakonisht udhëhiqej nga aktivistët, tani po udhëhiqte vetveten, duke reflektuar një akumulim të dhimbjeve të tre dekadave të fundit.

Edhe Entela Spahivoglin, organizatore që u bashkua me protestat në Tiranë pas aktivizmit të saj në Durrës kundër projektit TID, e sheh praninë masive femërore si një reflektim të natyrshëm të bashkimit familjar. Sipas saj, gratë janë aty krah bashkëshortëve, fëmijëve dhe prindërve, duke e kthyer protestën në një lëvizje të gjithëpërfshirëse qytetare.

Kjo dinamikë shënon një kthim drejt traditës së luftës për të drejtat qytetare, ku prania e grave shërben si treguesi më i fortë i transformimit shoqëror. Përmes zërave të tyre, kjo lëvizje po sfidon arrogancën e pushtetit dhe po kërkon një ndryshim rrënjësor në mënyrën se si funksionon Policia e Shtetit në mbrojtjen e qytetarëve.

Burim: Illyria
— Redaksia ZHURMA