Ulet numri i pacientëve në Gostivar
Autoritetet shëndetësore po e monitorojnë gjendjen, 127 pacientë të rinj
GOSTIVAR — Numri i qytetarëve që kanë kërkuar ndihmë mjekësore për shkak të simptomave të enterokolitit në Gostivar mbetet në nivel më të ulët krahasuar me periudhën më kritike, edhe pse gjatë ditës së fundit është regjistruar një rritje e lehtë.
Sipas të dhënave më të fundit të Ministrisë së Shëndetësisë, gjatë 26 korrikut, në institucionet publike shëndetësore në Gostivar janë evidentuar 127 pacientë të rinj që për herë të parë kanë kërkuar ndihmë mjekësore për simptoma të lidhura me enterokolitin. Nga Ministria informojnë se kjo shifër është pak më e lartë në krahasim me ditën paraprake, por megjithatë mbetet dukshëm më e ulët sesa në periudhën kur ishte arritur kulmi i numrit të të prekurve.
Të dielën janë regjistruar edhe dy hospitalizime të reja – një pacient është pranuar në repartin infektiv, ndërsa një tjetër në repartin pediatrik. Autoritetet shëndetësore vazhdojnë monitorimin e situatës në Gostivar dhe apelojnë qytetarët që të respektojnë rekomandimet për parandalim dhe të kërkojnë ndihmë mjekësore në kohë në rast të shfaqjes së simptomave.
Burim: TV21
— Redaksia ZHURMA