“Tungjatjeta” prezantohet si metodë e re dygjuhëshe për shqipen në diasporë
Metoda është hartuar nga Aljula Jubani, Linda Meniku dhe Adriana Bejko; versioni i parë del në shqip–anglisht të nivelit A1.
TIRANË — Projekti “Tungjatjeta”, një metodë e re dygjuhëshe për mësimin e shqipes, u prezantua gjatë Seminarit XIX Mbarëkombëtar të Mësuesve të Gjuhës Shqipe dhe të Kulturës Shqiptare në Diasporë dhe në Mërgatë. Ai synon fëmijët shqiptarë që rriten në mjedise dygjuhëshe dhe shumëgjuhëshe.
Prezantimin e bënë Dr. Mimoza Hysa, drejtoreshë e Qendrës së Botimeve për Diasporën, dhe Prof. Dr. Aljula Jubani, autore e metodës. “Tungjatjeta” është iniciuar nga QBD dhe është zhvilluar në bashkëpunim me Departamentin e Gjuhës Shqipe në Fakultetin e Historisë dhe të Filologjisë të Universitetit të Tiranës, si dhe me mësues të gjuhës shqipe në diasporë.
Metoda është hartuar nga Prof. Dr. Aljula Jubani, Prof. Dr. Linda Meniku dhe Dr. Adriana Bejko, e cila përgjigjet edhe për përkthimin në anglisht të botimit shqip–anglisht. Versioni i parë publikohet në nivelin A1, ndërsa projekti parashikon zgjerim në gjuhë të tjera për t’iu përshtatur komuniteteve shqiptare në vende të ndryshme të botës.
Burim: Diaspora Shqiptare
— Redaksia ZHURMA