Trump bën thirrje amerikanëve të votojnë për republikanët

Presidenti i SHBA-së, Donald Trump, zhvilloi tubime elektorale në Iowa dhe Kansas, në kuadër të përpjekjeve të fundit për të mobilizuar votuesit përpara zgjedhjeve të mesmandatit të 3 nëntorit. Ai u takua fillimisht me mbështetësit në Dubuque të Iowa-s, përpara se të udhëtonte drejt Salina-s në Kansas, ku u bëri thirrje qytetarëve të mbështesin kandidatët republikanë dhe të ndihmojnë partinë të ruajë kontrollin e Kongresit amerikan.

Gjatë fjalimit në Salina, Trump u shpreh se «nëse zgjidhni një Dhomë Përfaqësuesish dhe një Senat Republikan më 3 nëntor, ne do të vazhdojmë ta vendosim Amerikën të parën çdo ditë». Presidenti paraqiti prioritetet politike që synojnë republikanët, përfshirë ashpërsimin e politikave të imigracionit, kërkesa më të rrepta për identifikimin e votuesve dhe shtetësinë, si dhe ndalimin e qyteteve strehë për emigrantët. Po ashtu, ai kërkoi dënimin me vdekje për trafikantët e drogës në shkallë të gjerë, trafikantët e qenieve njerëzore dhe vrasësit e punonjësve të zbatimit të ligjit.

Duke theksuar rëndësinë e pjesëmarrjes në zgjedhje, kreu i shtetit u kërkoi votuesve në Kansas të mbështesin edhe senatorin republikan Roger Marshall bashkë me kandidatin për guvernator Ty Masterson. «Le të dalim dhe të bëjmë atë që bëjmë më mirë, që është të fitojmë, të fitojmë, të fitojmë», deklaroi ai, duke shtuar se fitorja do t'i bëjë dy vitet e ardhshme më të forta.