Presidenti Begaj dekreton ndarjen e re territoriale me 46 bashki

Presidenti i Republikës, Bajram Begaj, ka dekretuar sot më 2 nëntor ligjin nr. 100/2026 për ndarjen e re administrativo-territoriale, sipas të cilit Shqipëria do të reduktojë numrin e bashkive nga 61 në 46 për zgjedhjet vendore. Dekreti i kreut të shtetit i hap rrugë zbatimit të reformës që shkrin 15 bashki ekzistuese, ndërsa 12 qarqet e vendit do të mbeten të pandryshuara.

Ky zhvillim vjen pasi siç raportoi Zhurma më 30 tetor 2026, Presidenti Begaj dekretoi datën 9 maj 2027 për mbajtjen e zgjedhjeve të ardhshme vendore në Shqipëri, pas konsultimeve të zhvilluara me partitë parlamentare dhe Komisionerin Shtetëror të Zgjedhjeve.

Harta e re administrative parashikon organizimin e territorit në 46 bashki, 77 qyrte dhe 387 njësi administrative, ku qytetet do të kenë përfaqësim në këshillat bashkiakë. Projektligji u miratua në Kuvend më 9 tetor me 85 vota pro të shumicës parlamentare dhe 34 vota kundër nga opozita, gjatë një seance maratonë dhe me diskutime që zgjatën 14 orë. Sipas ndryshimeve të dekretuara, Fushë-Arrëzi i bashkohet Pukës, Klosi Matit, Rrogozhina Kavajës, Dimali dhe Poltiçani Beratit, Patosi Fierit, Divjaka Lushnjës, Selenica Vlorës, Maliqi Korçës, Këlcyra Përmetit, Memaliaj Tepelenës, Libohova Gjirokastrës, Cërriku dhe Belshi Elbasanit, ndërsa Përrenjasi i bashkohet Librazhdit. Deputetët opozitarë kundërshtuan reformën duke propozuar mbajtjen e një referendumi dhe pretenduan se ndarja u bë për efekt elektoral. Gjatë tensioneve në sallë, përfaqësues të opozitës hodhën sende dhe ujë në drejtim të kryeministrit dhe përfaqësuesve të mazhorancës.

Ndarja e re administrativo-territoriale pritet të zbatohet plotësisht në zgjedhjet lokale të 9 majit 2027, ku qytetarët do të votojnë për kryetarët e bashkive dhe këshillat e rinj bashkiakë sipas hartës me 46 njësi vendore.

Në njoftimin e Presidencës citohet dekreti i kreut të shtetit: «Në mbështetje të nenit 84, pika 1, dhe nenit 93 të Kushtetutës, Shpalljen e ligjit nr. 100/2026, ‘Për ndarjen administrativo-territoriale të njësive të qeverisjes vendore në Republikën e Shqipërisë’.» Socialistët i ftuan sërish përfaqësuesit e opozitës në tryezë për ringritjen e komisionit të posaçëm për territorialen, me qëllim diskutimin mbi funksionin e ardhshëm të bashkive të reja.