Tiranë: Gjashtë të arrestuar dhe dy në kërkim pas dhunës në protestë

TIRANË — Gjashtë persona janë vënë në pranga dhe tre të tjerë janë proceduar penalisht, ndërsa dy të tjerë janë shpallur në kërkim pas akteve të dhunës të shënuara gjatë një tubimi në Tiranë. Sipas Policisë, gjatë protestës disa persona kanë sulmuar punonjësit e policisë me sende të forta, lëndë piroteknike, bomba molotov, si dhe sfera dhe vida metalike, duke bllokuar gjithashtu qarkullimin dhe duke djegur kazanë mbeturinash.

Në mesin e të arrestuarve janë katër shtetas të moshës nga 18 deri në 38 vjeç, ku përfshihet edhe një shtetas i huaj, si dhe dy të mitur. Gjatë kontrolleve, autoritetet sekuestruan bomba molotov që iu gjetën dy prej të arrestuarve, ndërsa materialet procedurale i janë referuar Prokurorisë për vepra penale që përfshijnë tentativën për vrasje të punonjësit të policisë, kundërshtimin e forcave të rendit, pjesëmarrjen në grumbullime të paligjshme, pengimin e qarkullimit, shkatërrimin e pronës me zjarr dhe shkeljen e rregullave për lëndët plasëse.