Edi Rama emëron Vlera Gjakovën këshilltare për mediat

Kryeministri Edi Rama ka emëruar Vlera Gjakovën në detyrën e këshilltares për mediat. Gjakova, e cila është me origjinë nga Maqedonia e Veriut dhe ka jetuar gjatë në Kosovë, e ka marrë zyrtarisht këtë detyrë dy javë më parë.

Vlera Gjakova ka një bilanc të gjatë angazhimi publik dhe politik në rajon. Tetë vite më parë ajo iu bashkua Lëvizjes Vetëvendosje të Albin Kurtit në Kosovë. Më pas, në zgjedhjet parlamentare të vitit 2019, ajo kandidoi për deputete nën siglën e kësaj force politike, detaj të cilin e ka bërë të ditur edhe përmes rrjeteve të saj sociale. Veç angazhimit politik, ajo ka komentuar zhvillimet politike në Kosovë e Shqipëri dhe ka qenë pjesë e rubrikës «Rrethi Katror» në emisionin «E Diell» në Top Channel, nën moderimin e Edi Manushit.

Sipas burimeve qeveritare të cituara nga gazetari Muhamed Veliu, njoftimi zyrtar u është përcjellë sekretarëve të përgjithshëm të ministrive përmes një e-maili nga Vilma Guri, shefe e kabinetit dhe sekretare e përgjithshme në kryeministri. Në atë komunikim, Vilma Guri ka kërkuar që këshilltarët e medias të çdo ministrie të zhvillojnë takime me Vlerë Gjakovën për t’i paraqitur strategjitë e komunikimit. Në profilin e saj në Linkedin, zonja Gjakova e përshkruan veten si stratege në fushën e komunikimit, eksperte për energjinë e rinovueshme dhe publiciste me një eksperiencë 18-vjeçare për strategjitë e medias dhe marrëdhëniet me publikun.

Për sa i përket arsimimit, burimet e hapura online tregojnë se Gjakova ka përfunduar studimet Master për Filozofi dhe Psikanalizë në Qendrën Kërkimore për Filozofinë Greke. Ndërkohë, studimet Bachelor i ka kryer për Komunikim dhe Gazetari në Institutin Maqedonas për Media (MIM), si dhe ka ndjekur studime për Ekonomi dhe Tregti Ndërkombëtare.

Në përvojën e saj të mëparshme profesionale, ajo ka punuar si strategjiste e komunikimit dhe eksperte e energjisë së rinovueshme, me fokus në fusha të tilla si qytetet e zgjuara e të gjelbra dhe ekosistemet digjitale. Gjithashtu, ajo ka shërbyer si zëdhënëse dhe përfaqësuese e marrëdhënieve me publikun për EVN Maqedoni. Përveç kësaj, ajo njihet si aktiviste për të drejtat e njeriut dhe të drejtat civile, feministe dhe publiciste, duke shkruar edhe për platforma mediatike si Observatori Evropian i Gazetarisë.

Në vijim të marrjes së detyrës, këshilltarët e medias në të gjitha ministritë pritet të zhvillojnë takime punë me Vlerë Gjakovën për të prezantuar strategjitë e tyre të komunikimit.