Hapen qendrat e votimit në Bullgari për raundin e dytë presidencial

Qytetarët e Bullgarisë kanë nisur të votojnë këtë të diel në raundin e dytë të zgjedhjeve presidenciale, ku përballen presidentja Iliana Jotova dhe kandidati i opozitës pro-perëndimore Andrey Gyurov, pasi vendvotimet u hapën në orën 07:00 në të gjithë vendin.

Paraprakisht, procesi electoral pason balotazhin ku Jotova mori 35 për qind të votave ndaj 32 për qind që siguroi Gyurov, në një raund të parë të shënuar nga një pjesëmarrje prej vetëm 23 për qind të votuesve. Ky proces po zhvillohet pas një sërë sulmesh me dronë ndaj anijeve tregtare në Detin e Zi pranë bregdetit bullgar gjatë muajit tetor, ngjarje që lanë 21 persona të zhdukur dhe nxitën debatin politik mbi marrëdhëniet me Rusinë.

Vendvotimet do të mbyllen zyrtarisht në orën 20:00, por votimi mund të vazhdojë deri në orën 21:00 në ato qendra ku ka ende qytetarë në radhë, sipas rregullave zgjedhore. Analisti politik Teodor Slavev tha për AFP-në se rezultati i raundit të parë reflektoi verdiktin e votuesve për reagimin jo bindës të Jotovës ndaj kërcënimeve ruse në det. Nga ana tjetër, sociologia Boriana Dimitrova deklaroi për të njëjtën agjenci se pjesëmarrja e ulët në fillim mund të kishte ardhur nga bindja e qytetarëve se fitorja e Jotovës ishte e sigurt, si dhe nga pakënaqësia me koalicionin e kryeministrit Rumen Radev. Ndërkohë, analistët parashikojnë se pjesëmarrja e votuesve do të jetë më e lartë në këtë raund të dytë.

Kandidatët përfaqësojnë dy linja të ndryshme politike për shtetin me 6.4 milionë banorë, i cili mbetet vendi më i varfër në Bashkimin Evropian. Jotova, 62 vjeçe, ish-gazetare dhe anëtare e Parlamentit Evropian, mori detyrën e presidentes këtë vit pas dorëheqjes së Radevit dhe kërkon të bëhet gruaja e parë e zgjedhur drejtpërdrejt në këtë post, duke premtuar gjithashtu trajtimin e varfërisë. Kundërshtari i saj Gyurov, 50 vjeç, ish-zëvendësguvernator i Bankës Kombëtare të Bullgarisë dhe ish-kryeministër teknik, gëzon mbështetjen e opozitës pro-perëndimore dhe mbron fuqishëm lidhjet euroatlantike.

Në debatin televiziv përpara votimit, kandidatët shpalosën qëndrimet e tyre për luftën në Ukrainë. Gyurov kritikoi rivalen e tij për mospërmendjen e fajtorit dhe tha: «Rusia duhet ta ndalojë agresionin e saj që të mund të ndërmerren hapat e ardhshëm. Le ta emërtojmë shtetin nga i cili vijnë kërcënimet». Nga ana e saj, Jotova u shpreh se «paqja mund të vijë vetëm përmes negociatave» dhe shtoi se «të derdhësh më shumë para në Ukrainë, të furnizosh me armë të reja dhe më të sofistikuara, çon vetëm drejt shkatërrimit edhe më të madh dhe vdekjes së shumë njerëzve në të dyja palët». Ndërkaq, Radev ka deklaruar se zgjedhjet përfaqësojnë një zgjedhje mes paqes e luftës, duke bërë thirrje: «Le të votojmë për Iliana Jotovën, që Bullgaria të jetë në duar të sigurta».