Pse i bashkohen tifozët Kuqezi dhe Plisat protestës së studentëve në Shkup?
Dy grupet tifozë konfirmojnë pjesëmarrjen në protestën e 18 majit për të drejtën e provimit të Jurisprudencës në gjuhën shqipe.
SHKUP — Tifozët Kuqezi të Kombëtares Shqiptare dhe tifo-grupi "Plisat" nga Prishtina kanë konfirmuar mbështetjen për protestën e studentëve shqiptarë më 18 maj, në mbrojtje të së drejtës për përdorimin e gjuhës shqipe në provimin e Jurisprudencës.
Të dy grupet kanë ftuar qytetarët t'u bashkohen protestës që do të mbahet të hënën, ora 16:30, para Urës së Gurit në Shkup. "Plisat" theksojnë se "sa herë që preken interesat kombëtare, Plisat do të jenë aty", duke e cilësuar gjuhën shqipe "të pacenueshme dhe të paprekshme". Ata njoftuan se do të jenë të pranishëm në "Shkupin shqiptar", përkrah studentëve nga Ilirida.
Studentët kërkojnë respektimin e Ligjit për Përdorimin e Gjuhëve, që u jep të drejtën t'i nënshtrohen provimit edhe në shqip. Protesta ka marrë mbështetje edhe nga organizata studentore, profesorë, diaspora shqiptaro-amerikane dhe grupe qytetare të tjera.
Burim: Gazeta Express
— Redaksia ZHURMA