QKUK realizon lindjen e parë përmes fertilizimit të asistuar në sektorin publik

PRISHTINË — Në Klinikën e Obstetrikës dhe Gjinekologjisë në Qendrën Klinike Universitare të Kosovës është realizuar me sukses lindja e parë e një pacienteje 31-vjeçare pas mbarësimit përmes procedurave të fertilizimit të asistuar (IVF) në sektorin publik shëndetësor. Foshnja e gjinisë femërore ka lindur me peshë 3.300 gramë përmes prerjes cezariane, ndërsa gjendja e saj dhe e nënës është stabile.

Patientja iu drejtua shëndetësisë publike para një viti, pas gjashtë vitesh përballje me sfidën e infertilitetit dhe trajtimeve të ndryshme. Ekzaminimet, stimulimi dhe procedura e mbarësimit u kryen në repartin e specializuar të QKUK-së, duke shënuar rastin e parë të suksesshëm të lindjes nga shtatzënitë e realizuara në këtë institucion publik.

Drejtori i Klinikës së Gjinekologjisë, Zef Ndrejaj, njoftoi se deri më tani mbi 2 mijë e 700 çifte kanë kërkuar ndihmë mjekësore në repartin e IVF-së. Ai bëri të ditur se nga më shumë se 38 transfere të embrioneve të realizuara në klinikë, janë konfirmuar 11 shtatzëni. Ndrejaj shpjegoi se dy tentativat e para për procedurën e fertilizimit të asistuar në QKUK ofrohen falas për pacientët, ndërsa për tentativën e tretë apo të katërt aplikohet një çmimore me kosto shumë më të ulët se në klinikat private.

Drejtuesi i klinikës përmendi gjithashtu se pacientet mbi moshën 40-vjeçare që kanë nevojë për qeliza dhuruese përballen me pamundësinë e kryerjes së procedurës për shkak të mungesës së bazës ligjore. Ndrejaj shprehu shpresën se projektligji përkatës që ndodhet në procedurë parlamentare do të miratohet së shpejti në Kuvend.

QKUK vlerësoi se ky zhvillim dëshmon përkushtimin e stafit mjekësor në ofrimin e shërbimeve bashkëkohore dhe përfaqëson një shpresë të re për çiftet që përballen me infertilitet. Institucioni e cilësoi këtë ngjarje si një hap përpara në avancimin e shërbimeve shëndetësore publike dhe përmirësimin e mirëqenies së qytetarëve.

Nëna e foshnjës deklaroi pas lindjes: «Jam tej mase e lumtur. Stafi ka qenë shumë i mirë dhe gjithçka ka shkuar në rregull. Është një emocion shumë i madh, nuk di ta përshkruaj».

Ndrejaj nëgasi rezultatet e arritura duke thënë: «I ka tejkalu pritshmëritë tona. Besoj që jemi në rrugë të mirë që të ketë sukses. Mund të thëmi se pas kësaj lindje që sot ka ndodh mbas procedurave të IVF së jemi në rrugë të mirë dhe suksesi është evident. Besoj që në vitet që vijnë do të kemi sukses dhe më të madh. Prej 36 transfereve ti kemi 11 shtatzani të konfirmuara është sukses shumë i madh».