Pse u tensionua dita e 15-të e protestës para Kryeministrisë?
Organizatorët e cilësuan provokim kërkesën për karta identiteti, ndërsa protestuesit festuan largimin e deputetes Marjana Koçeku nga Partia Socialiste.
TIRANË — Ditën e 15-të të protestës qytetare para Kryeministrisë e shoqëruan tensionet e para. Persona të panjohur me kapuça të zinj dhe syze prishën qetësinë e tubimit kur u përhapën zëra se pjesëmarrësve po u kërkoheshin kartat e identitetit për të firmosur një peticion të paqartë.
Organizatorët nxituan ta cilësonin këtë kërkesë si një provokim të qëllimshëm. Protestuesit vijuan tubimin me thirrjet për dorëheqjen e qeverisë Rama dhe krijimin e një qeverie tranzitore, duke shprehur pakënaqësitë ndaj klasës politike të 35 viteve të fundit përmes pankartave ironike dhe humorit.
Largimin e deputetes së Shkodrës, Marjana Koçeku, nga grupi parlamentar i socialistëve, protestuesit e cilësuan si një fitore të madhe të sheshit. Një nga oratorët deklaroi se rënia e këtij guri të shahut tregon se deputetët e mazhorancës do të bien një nga një si gurë dominoje.
Sot tubimit iu bashkuan edhe banorë të Durrësit që kundërshtojnë projektin TID. Pas fjalimeve në podiumin para Kryeministrisë, qytetarët marshuan përgjatë rrugëve të Tiranës duke bërë thirrje për të qëndruar në shesh deri në fund.
Burim: Insajderi
— Redaksia ZHURMA