AUV asgjëson mbi 21 mijë kilogramë produkte mishi të kompanisë ELKOS

Agjencia e Ushqimit dhe Veterinarisë ka asgjësuar 21 mijë e 226 kilogramë produkte mishi dhe artikuj të tjerë ushqimorë të kompanisë ELKOS SH.P.K. më 30 tetor 2026. Asgjësimi i këtyre mallrave u realizua nën mbikëqyrjen e inspektorëve zyrtarë, në zbatim të urdhëresës së Inspektoratit Veterinar dhe sipas Ligjit Nr. 08/L-120 për Ushqim.

Kjo ndërhyrje pasoi një urdhër fillestar të Agjencisë së Ushqimit dhe Veterinarisë për ndalimin e shitjes, tërheqjen nga tregu dhe eliminimin e 3,130 kilogramëve kofshë pule të ngrira, te të cilat ishte vërejtur prani e mykut. Po ashtu, vetëm pak ditë më parë, autoriteti rregullator kishte ndërmarrë masa të ngjashme ndaj të njëjtës kompani dhe kompanisë Apetit. Në rastin e kompanisë Apetit, të premten u ndalua shitja dhe u urdhërua tërheqja e dy lotëve me mish të ngrirë pule të importuar nga Brazili, për shkak të pranisë së bakterit Salmonella Minnesota.

Sipas njoftimit zyrtar të AUV-së dhe evidencës së vetë operatorit ekonomik, produktet e asgjësuara përfshijnë mushkëri, kofshë pule, mish pule, mish të grirë, mish gjedhi, mish mule, si dhe produkte të tjera ushqimore. Agjencia njoftoi se kompania ELKOS SH.P.K. ka vazhduar procedurën e gjurmueshmërisë dhe grumbullimit pas konstatimit të ndryshimeve në cilësitë organoleptike dhe pranisë së mykut në këto artikuj.

Agjencia e Ushqimit dhe Veterinarisë bëri me dije se procesi i gjurmueshmërisë dhe mbledhjes së sasive të tjera ushqimore është ende duke vazhduar në terren. Autoriteti konfirmoi se të gjitha produktet që do të identifikohen si të papërshtatshme për konsum do t'u nënshtrohen menjëherë masave të ndalimit të shitjes, tërheqjes nga tregu dhe asgjësimit.