Eksporti i parë dhe 121 telefona të ndaluar te Dheu i Bardhë

Dogana e Kosovës ka shënuar rritje prej 5.9 për qind të të hyrave gjatë muajit tetor, duke arritur shumën prej 186.6 milionë eurosh krahasuar me 176.2 milionë euro sa ishin në periudhën e njëjtë të vitit të kaluar. Krahas këtij arkëtimi, institucioni ka përfshirë në buletinin e tij mujor edhe disa aktivitete tjera të rëndësishme në fushën e tregtisë dhe kontrollit.

Në pikën kufitare Dheu i Bardhë është realizuar eksporti i parë pas hyrjes në zbatim të plotë të Marrëveshjes së Tregtisë së Lirë Kosovë-EFTA. Ndërkaq, Sektori i Antikontrabandës ka ndaluar 121 telefona celularë pa dokumentacionin përkatës. Gjithashtu, është organizuar punëtoria e parë ndërkombëtare për vlerësimin doganor në kuadër të programit Customs Programme, me pjesëmarrjen e përfaqësuesve të DG TAXUD.