Kur nis operimi i zonës së lirë ekonomike TEDA Tirana?

TIRANË — Projekti i Bashkisë së Tiranës për krijimin e zonës së lirë ekonomike TEDA Tirana synon të nisë operimin zyrtar gjatë vjeshtës së këtij viti. Ky projekt, që vjen pas vitesh planifikimi dhe vonesash, synon të shërbejë si magnets për investime në sektorë strategjikë si teknologjia, logjistika, industria e lehtë dhe qendrat e të dhënave.

Administratori i TEDA Tirana, Dritan Delija, deklaron se aktualisht janë në fazën e konsolidimit institucional dhe përgatitjes operative. Sipas tij, është përmbyllur procesi administrativ dhe dokumentacioni i nevojshëm për t'u përshtatur me Kodin Doganor dhe atë Tatimor, hapat kritikë për marrjen e certifikimit final dhe hapjen e zonës për investitorët.

Një nga arritjet kryesore është marrëveshja kontraktuale e nënshkruar prej rreth një viti me një kompani izraelite. Kjo kompani planifikon të zhvillojë një Data Center që do të nisë me një kapacitet prej 30 MW, me synimin për të arritur deri në 100 MW brenda pesë viteve të ardhshme, duke u pozicionuar si një nga më të mëdhatë në nivel Ballkani.

Sipas Delijës, prezenca e një qendre të dhënash të tillë rrit ndjeshëm seriozitetin e zonës dhe e bën atë më tërheqëse për investitorë të tjerë, veçanërisht ata të industrive me komponent teknologjik të lartë. Interesi aktual është i konsiderueshëm, ndërsa TEDA ka kryer kontakte edhe me modele të ngjashme në Itali, Gjermani dhe Emiratet e Bashkuara Arabe.

Sektorët që mund të operojnë në këtë zonë janë të përcaktuar me ligj dhe përfshijnë industrinë automotive, ICT, shërbimet teknologjike, sektorin farmaceutik dhe industrinë mjekësore. Pozicioni gjeografik i Shqipërisë konsiderohet si një avantazh strategjik për të tërhequr kapital të huaj në rajonin e Ballkanit.

Modeli i zhvillimit është i tipit “greenfield”, ku TEDA ofron tokën me qira dhe lehtësitë fiskale përkatëse. Ndërsa punimet bazë të infrastrukturës kanë përfunduar në pjesën më të madhe, çdo ndërtim specifik brenda zonës do të realizohet dhe do të financohet plotësisht nga investitorët sipas kërkesave të tyre.

Aktualisht, Bashkia e Tiranës po punon në terren për përmbushjen e kushteve teknike që kërkon kuadri doganor dhe tatimor. Punimet aktualisht po fokusohen në përfundimin e godinës administrative, ndërkohë që investitori izraelit është gati të nisë punimet sapo të krijohen kushtet operative brenda zonës.

Burim: Monitor
— Redaksia ZHURMA