Çfarë ofron Nexus Park Tirana për të tërhequr kompanitë farmaceutike dhe teknologjike italiane?

— CEO i Nexus Park Tirana, Sokol Kraja, ka zbuluar se projekti i ri industrial ka nënshkruar marrëveshjet e para me investitorë, ku dominon sektori i shëndetësisë dhe teknologjisë mjekësore. Parku, i cili pritet të nisë operimin brenda pak muajsh, ka tërhequr dy kompani italiane për prodhimin e pacemaker-ëve dhe defibrilatorëve kardiakë.

Përveç industrisë farmaceutike, Kraja vë në dukje praninë e një kompanie tjetër italiane për montimin e laboratorëve dentarë, si dhe një investitor të tretë që furnizon spitalet me pajisje mjekësore. Këto kompani kanë nisur tashmë investimet dhe përshtatjen e ambienteve sipas nevojave specifike të prodhimit të tyre.

Projekti shtrihet në një sipërfaqe prej 55 mijë metrash katrorë, me një vlerë totale investimi prej rreth 34 milionë euro. Sipas CEO-s, investimi fillestar është realizuar nga zhvilluesi, gjë që u mundëson investitorëve të marrin ambiente të gatshme për të nisur aktivitetin menjëherë pas hapjes së parkut.

Vendndodhja strategjike në kilometrin e 5-të të autostradës Tiranë–Durrës, vetëm 3 kilometra nga Aeroporti Ndërkombëtar i Tiranës dhe 20 kilometra nga Porti i Durrësit, konsiderohet si një nga pozicionet më konkurruese. Kjo lehtëson logjistikën dhe aksesin në tregun e rajonit Tiranë–Durrës, i cili përfaqëson 60% të tregut shqiptar.

Nexus Park Tirana ka marrë licencën si zonë e lirë ekonomike, një status që i jep lehtësitë fiskale të ngjashme me Zonat e Zhvillimit Ekonomik dhe Teknologjik. Një element kyç është vendosja e degës doganore brenda parkut, gjë që do të lejonte bizneset të kryejnë të gjitha procedurat e import-eksportit në vend.

Kraja thekson se konkurrenca e Shqipërisë nuk është brenda vendit, por me vendet e rajonit si Serbia, Maqedonia e Veriut dhe Hungaria. Sipas tij, kostoja më e ulët e operimit është arsyeja kryesore pse investitorët e huaj po shohin drejt Shqipërisë, ndërsa cilësia konsiderohet tashmë si një detyrim dhe jo avantazh.

Zhvilluesi synon të shërbejë si ndërmjetës për të ulur kostot administrative dhe procedurale në raportin mes investitorëve dhe administratës publike. Kraja vërejt që imazhi i përmirësuar i vendit, i nxitur nga turizmi dhe rritja e pasagjerëve në aeroport, ka ndikuar pozitivisht në perceptimin ndërkombëtar të Shqipërisë.

Burim: Monitor
— Redaksia ZHURMA