Tahiri: Qeveria e Albin Kurtit nuk është stabile pavarësisht numrave

Deputeti i Aleancës, Besnik Tahiri, ka vlerësuar se Qeveria e udhëhequr nga Albin Kurti nuk është stabile pavarësisht se e mbështesin 62 deputetë në Kuvend. Sipas tij, kjo mbështetje e ngushtë parlamentare e vë kryeministrin përballë kërkesave të vazhdueshme nga deputetët, përfshirë edhe ata të komuniteteve joshumicë që kërkojnë më shumë pozita ministrore.

Duke analizuar gjendjen politike, Tahiri ka deklaruar të enjten në emisionin «Interaktiv» të KTV-së se Kurti nuk ndodhet në një pozitë komode. Sipas deputetit të Aleancës, funksionimi me një shumicë prej 61 deputetësh krijon rrethana ku secili prej tyre mund të parashtrojë kërkesa të veçanta ndaj udhëheqësit të ekzekutivit.

Tahiri ka kritikuar gjithashtu përbërjen aktuale të kabinetit qeveritar, duke i vlerësuar ministrat aktualë si ndër më të dobëtit. Ai ka shtuar se kryeministri dhe Lëvizja Vetëvendosje duhet të kuptojnë se arritja e rezultateve të mëdha kërkon bashkëpunim me partnerë politikë dhe një ekip më të gjerë, me gjithë qëndrimin e prerë të Aleancës kundër hyrjes në koalicion.

Lidhur me bllokun opozitar, Tahiri ka shprehur pakënaqësi për funksionimin e tij aktual dhe të kaluar. Ai ka përmendur se Partia Demokratike e Kosovës nuk ndodhet në situatë të lehtë, ndërsa Lidhja Demokratike e Kosovës po kalon nëpër procese zgjedhore. Megjithatë, deputeti ka theksuar se Raporti i Progresit mund të shërbejë si një pikë kthese për bashkimin opozitar.

Sipas Tahirit, tri grupet parlamentare opozitare kanë zhvilluar diskutime për këtë çështje. Ata synojnë që javën e ardhshme të zhvillojnë një debat përmbajtësor të mbështetur me 40 nënshkrime, hap ky që shihet si fillimi i përbashkimit të opozitës.

«Kurti nuk është komod. Nuk i ka të gjithë numrat, i ka 61 deputetë, qeverisja me 61 vota është qeverisje me 61 kryeministra, sepse secili e ka nga një kërkesë. Atij veç i kanë filluar kërkesat», ka thënë ai.

«Kurti duhet ta kuptojë që për të arritur për të bërë diçka të madhe, duhet bërë me një partner. Nuk po them me Aleancën, nuk po kërkoj koalicion. Ne në fakt kemi pasur qëndrim të prerë. Mendojmë se ky koncept qeverisës se si është tash, me këtë ekip të ministrave, janë ndër ministrat më të dobët», është shprehur Tahiri.

«Shkelja, përmbysja, mostrajtimi, besimi është papërgjegjësi. Nuk jam i kënaqur se si po funksionon opozita, as nuk kam qenë i kënaqur as në të kaluarën, as nuk kam qenë i kënaqur në shkurt kur është dashur ta themelojmë qeverinë opozita, s’ka ndodhur. Po flas për shkurtin e kaluar. Shkuam në zgjedhje, për çka shkuam në zgjedhje? Ja erdhëm në zgjedhje, është ditur që nuk ndryshon elektorati kaq shpejt. PDK-ja nuk është në situatë të lehtë. LDK-ja i kanë edhe ata tani proceset zgjedhore. Unë po shpresoj që një momentum të mirë e kemi Raportin e Progresit. Ne e kemi diskutuar tri grupet parlamentare dhe besoj që javën e ardhshme do të kemi debat përmbajtësor me 40 nënshkrime dhe kjo është nisja e parë e përbashkimit të opozitës nëse arrijmë të shkojmë me 40 nënshkrime», ka deklaruar deputeti i Aleancës.