Stoillkoviq refuzon pyetjet për heshtjen ndaj thirrjeve antishqiptare

KUMANOVË — Ministri i Vetëqeverisjes Lokale në Qeverinë e Maqedonisë së Veriut, Ivan Stoillkoviq, ka refuzuar t'u përgjigjet pyetjeve të gazetarëve lidhur me heshtjen e tij ndaj incidenteve me thirrje antishqiptare. Stoillkoviq u shfaq i irrituar kur u pyet për këtë çështje gjatë një ngjarjeje publike në qytetin e Kumanovës.

Gazetari i televizionit Alsat, Zekirija Haxhiu, e pyeti ministrin se përse kishte reaguar menjëherë për shkarravitjen e hyrjes së shoqatës kulturore serbe “Sëprski Vez”, ndërsa kishte heshtur në të kaluarën për thirrjet “vdekje për shqiptarët”. Stoillkoviq u arsyetua duke thënë se nuk dëshironte ta prishë atmosferën e ngjarjes aktuale.

Stoillkoviq ka shërbyer më parë për dy vjet si ministër për marrëdhënie mes bashkësive, por asnjëherë nuk ka reaguar ndaj ofendimeve publike ndaj shqiptarëve. Gjatë kësaj periudhe, në salla sportive dhe ndeshje janë dëgjuar brohoritje të shpeshta albanofobe, pa pasur asnjë reagim zyrtar apo ndëshkim nga autoritetet përkatëse.

Përkundër zotimeve për ndërmarrjen e masave, askush nuk është dënuar deri më tani për thirrjet si “dhoma gazi për shqiptarët”. Ky reagim selektiv i ministrit Stoillkoviq dëshmon për standardin e dyfishtë që ekziston në trajtimin e gjuhës së urrejtjes ndaj shqiptarëve në Maqedoninë e Veriut.

Burim: Gazeta Metro
— Redaksia ZHURMA