Startup-i i Mira Muratit synon 5 miliardë dollarë financim

Startup-i i inteligjencës artificiale Thinking Machines Lab, i themeluar nga Mira Murati, po zhvillon negociata për të siguruar 5 miliardë dollarë në një raund të ri financimi që mund ta çojë vlerësimin e kompanisë në rreth 40 miliardë dollarë. Raundi i ri i investimeve pritet të udhëhiqet nga fondi Accel, ndërsa nëse marrëveshja finalizohet sipas kushteve të raportuara, vlera e kompanisë pas financimit mund të arrijë deri në 45 miliardë dollarë, duke u rritur ndjeshëm që nga themelimi i saj.

Në vitin e shkuar, kur u themelua nga ish-drejtoresha e teknologjisë në OpenAI, startup-i arriti të sigurojë 2 miliardë dollarë në raundin e parë të financimit, duke u vlerësuar në më shumë se 10 miliardë dollarë madje përpara prezantimit të produktit të saj të parë. Kompania kishte zhvilluar më herët bisedime edhe për një vlerësim prej 50 miliardë dollarësh, por ato negociata nuk u përmbyllnën me një marrëveshje, sipas të dhënave të publikuara nga Business Insider dhe burimeve të njohura me çështjen.

Produkti i parë i kompanisë, i quajtur Tinker, u mundëson zhvilluesve të përshtatin modele të mëdha gjuhësore sipas nevojave të tyre, ndërsa kompania ka prezantuar gjithashtu përditësime që synojnë përmirësimin e aftësive të inteligjencës artificiale në fushën e programimit dhe kodimit. Përveç kësaj, sipas materialeve të publikuara nga Tetova Sot, Thinking Machines Lab po ndërton një model të ri të inteligjencës artificiale që mund të bashkëbisedojë në kohë reale, duke përdorur termin teknik full duplex.

Ky model i ri, i emërtuar TML-Interaction-Small, synon të përpunojë fjalinë e përdoruesit dhe të gjenerojë një përgjigje në të njëjtën kohë, duke u përgjigjur në 0.40 sekonda, që përfaqëson shpejtësinë e një bisede normale mes njerëzish dhe dukshëm më të shpejtë se modelet e OpenAI dhe Google, raportojnë burimet. Megjithatë, bëhet fjalë vetëm për një projekt paraprak dhe jo për një produkt konkret tregtar.

Për sa i përket zhvillimeve të brendshme, rrugëtimi i kompanisë është shoqëruar edhe me sfida lidhur me ruajtjen e talenteve, pasi disa prej anëtarëve kryesorë të ekipit themelues janë larguar drejt kompanive rivale si Meta dhe OpenAI. Deri në muajin maj, sipas raportimeve të mediave, rreth një e treta e ekipit fillestar ishte larguar nga startup-i, ndërsa disa nga figurat kryesore kishin punuar më parë në zhvillimin e versioneve të hershme të ChatGPT.

Për momentin, raundi i ri i financimit mbetet në fazën e negociatave dhe nuk është konfirmuar zyrtarisht nga kompania, ndërsa një pasqyrë e kufizuar kërkimore pritet të vijë në muajt e ardhshëm dhe dalja në shkallë të gjerë parashikohet të ndodhë gjatë këtij viti, duke pozicionuar startup-in mes kompanive private më të vlefshme në industrinë globale.