Shkombëtarizimi i mërgatës nxitet nga islamizmi ekstremist

Rreziku kryesor për diasporën shqiptare mbetet shkombëtarizimi i nxitur nga fushata e imamëve dhe mungesa e investimeve në edukimin e fëmijëve. Përgjegjësia kryesore për këtë situatë i adresohet shtetit të Kosovës, shtetit zviceran dhe prindërve, ndërkohë që Bashkësitë Islame në Prishtinë e Shkup akuzohen se jo vetëm nuk e luftojnë këtë dukuri, por e stimulojnë atë bashkë me një pjesë të madhe të imamëve të pozicionuar në mërgatë.

Sipas të dhënave të bëra publike, një imam me banim në Zürich dhe origjinë nga Maqedonia mori pjesë në një konferencë të mbajtur në vitin 2024 në Doha, ku mysafir kryesor ishte Ismail Hanije, lideri i organizatës Hamas. Pas presionit mediatik, ky imam u largua nga të gjitha funksionet që mbante në organizatën ku vepronte, e cila kishte përfituar 2,5 milionë franga vetëm nga Kantoni i Zürichut me synimin për të ndihmuar në integrimin e komunitetit shqiptar.

Ekspertët e sigurisë theksojnë se disa prej imamëve me origjinë nga Kosova dhe Maqedonia që veprojnë në Zvicër mbështesin Vëllazërinë Myslimane, pasi kanë studiuar në vendet arabe. Ndërkohë, qeveria e Kosovës dhe ministrat shqiptarë në Maqedoni vazhdojnë ta anashkalojnë problemin e ekstremizmit islamist, pa pasur një strategji konkrete përballjeje.