Spitali i Gjilanit nis vendosjen e protezave të gjurit dhe kërdhokullës

GJILAN — Spitali i Përgjithshëm i Gjilanit ka filluar për herë të parë realizimin e ndërhyrjeve kirurgjike për vendosjen e protezave totale të gjurit dhe të kërdhokullës, pas sigurimit të tyre nga Shërbimi Spitalor Klinik dhe Universitar i Kosovës (SHSKUK). Ky hap shënon një etapë të re për Repartin e Ortopedisë në zgjerimin e kapaciteteve profesionale dhe shërbimeve specialistike, duke u mundësuar pacientëve marrjen e trajtimeve bashkëkohore më afër vendbanimit.

Drejtori i përgjithshëm i Spitalit të Gjilanit, Dr. Afrim Cana, ka kontaktuar personalisht pacientët e parë nga lista e pritjes për t'i ftuar në këto ndërhyrje. Kjo nismë synon lehtësimin e qasjes në shërbime të specializuara dhe reduktimin e udhëtimeve për qytetarët që përballen me dëmtime të avancuara të nyjeve.