Si reagon Serbia ndaj posterëve të urrejtjes në Krushevc?

KRUSHEVC — Avokati i Popullit në Serbi, Zoran Pashalliq, u bëri thirrje organeve kompetente që të identifikojnë autorët e posterëve me mesazhe urrejtjeje ndaj shqiptarëve dhe të ndërmarrin masa për të parandaluar raste të ngjashme. Ai theksoi se shteti ka detyrimin të mbrojë të drejtat e të gjitha pakicave kombëtare.

Posterët u shfaqën pranë një furre buke në pronësi të një familjeje shqiptare, duke bërë thirrje për bojkotimin e bizneseve të shqiptarëve. Juristja Brankica Jankoviq vlerësoi se raste të tilla duhet të dënohen nga i gjithë opinioni publik, pasi cenojnë bashkëjetesën dhe sigurinë e komuniteteve.

Partia opozitare Lëvizja e Qytetarëve të Lirë kërkoi nga policia dhe prokuroria që të zbardhin rastin dhe të hetojnë nëse janë konsumuar elemente të veprave penale që lidhen me nxitjen e urrejtjes dhe intolerancës kombëtare.

Burim: Sinjali
— Redaksia ZHURMA