Si reagon Avokati i Popullit pas posterëve në Krushevc?

KRUSHEVC — Avokati i Popullit i Serbisë, Zoran Pashaliq, u ka kërkuar autoriteteve gjyqësore t'i zbardhin menjëherë të gjitha rrethanat rreth vendosjes së posterëve me përmbajtje urrejtjeje kundër pjesëtarëve të pakicës kombëtare shqiptare në Krushevc, qytet në Serbinë qendrore, si dhe t'i identifikojnë e t'i sjellin para drejtësisë përgjegjësit.

Thirrja e tij vjen pasi përpara një furre buke në pronësi të shqiptarëve në Krushevc u shfaqën mesazhe urrejtjeje, me thirrje drejtuar qytetarëve që të "kujtojnë Gazimestanin" dhe të mos blejnë nga shqiptarët. Avokati i Popullit paralajmëroi se veprime të tilla përbëjnë shprehje të papranueshme të mosdurimit dhe diskriminimit.

Posterët, sipas tij, e rrezikojnë sigurinë e qytetarëve dhe e dëmtojnë besimin ndërmjet komuniteteve. Pashaliq deklaroi se "çdo qytetar i Serbisë ka të drejtë të jetojë pa frikë nga diskriminimi, frikësimi dhe gjuha e urrejtjes, pavarësisht përkatësisë së tij kombëtare".

Në deklaratën e tij, Pashaliq u bëri thirrje institucioneve përgjegjëse t'i marrin të gjitha masat e nevojshme për të parandaluar përsëritjen e incidenteve të ngjashme. Ai theksoi se organet shtetërore janë të detyruara t'i mbrojnë në mënyrë të barabartë të drejtat e të gjitha pakicave kombëtare dhe të veprojnë me vendosmëri ndaj çdo forme diskriminimi.

Edhe Lëvizja e Qytetarëve të Lirë (PSG), subjekt opozitar në Serbi, i kërkoi policisë dhe prokurorisë të përcaktojnë pa vonesë kush qëndron pas përgatitjes dhe ngjitjes së posterëve. PSG vlerësoi se është veçanërisht e rrezikshme që posteri është ngjitur përpara furrës së bukës në pronësi të një shqiptari.

Sipas PSG-së, në këtë mënyrë "njerëz konkretë ekspozohen ndaj presionit, persekutimit dhe dhunës së mundshme". Lëvizja e cilësoi mesazhin si "shënjestrim i hapur i njerëzve vetëm për shkak të përkatësisë së tyre kombëtare", duke shtuar se përgjegjësia për çdo vepër penale i takon individit, jo një populli të tërë.

Thirrja për hetim vjen disa ditë pas ngjarjeve të 28 qershorit në Gazimestan, ku policia e Kosovës arrestoi 37 persona, 36 prej tyre dolën para gjykatës, për thirrjet "Kosova është Serbi" me tre gishta të ngritur. Masa e dëbimit dhe e ndalimit të hyrjes në Kosovë për tre vjet, së bashku me gjoba monetare, u shqiptuan për shkak të këtyre thirrjeve.

Burimet: Gazeta Dukagjini, Lajmi.net, Illyria, Demokracia
— Redaksia ZHURMA