Si po ecën projektimi i tunelit për rrugën Tetovë-Prizren?
Nikollovski thotë se Fakulteti i Ndërtimtarisë ka kërkuar informacione shtesë për gjatësinë e tunelit dhe pikën e lidhjes.
TETOVË — Ministri i Transportit i Maqedonisë së Veriut, Aleksandar Nikollovski, njoftoi se rruga Tetovë-Prizren — projekt i dakorduar mes qeverive të Shkupit dhe Prishtinës — po përparon në fazën e projektimit të tunelit, i cili do të jetë tuneli më i madh në vend. Nikollovski tha se Fakulteti i Ndërtimtarisë ka përfunduar projektin bazë dhe ka kërkuar informacione shtesë për gjatësinë e tunelit dhe pikën e lidhjes, të cilat ministria tani po i dorëzon.
Ministri e cilësoi tunelin një nga projektet inxhinierike më komplekse. Sipas tij, pasi të përfundojë projektimi, qeveria do ta dijë vlerën e saktë të punimeve dhe do të nisë sigurimin e fondeve, para se të fillojnë punimet konkrete.
Sa i përket autostradës Tetovë-Gostivar, Nikollovski paralajmëroi se kilometrat e parë do të jenë gati vitin e ardhshëm. Nëse punimet vazhdojnë me dinamikën aktuale, autostrada pritet të përfundojë tërësisht deri në fund të vitit 2028.
Ministri tha se çështjet e shpronësimit janë zgjidhur tashmë, ndërsa po zgjidhen edhe ato të zhvendosjes së tubacioneve. Sipas tij, mbikalimet dhe urat po ndërtohen paralelisht me pjesën tjetër të rrugës, në mënyrë që të mos ndahet popullsia nga të dyja anët e autostradës. Nikollovski u shpreh veçanërisht krenar për dinamikën aktuale të punimeve.
Nikollovski njoftoi gjithashtu se, së bashku me Bashkimin Evropian, po punohet intensivisht për dokumentacionin e lidhjes hekurudhore mes Shkupit, Tetovës dhe Gostivarit.
Burim: Tetova Sot
— Redaksia ZHURMA